“نۆ رۆژنامەنووسی ديکە لە بادینان دادگایی دەكرێن”
SNN
پارێزەری دەستگیركراوانی بادینان رايگەياند: “ نۆ رۆژنامەنووس و چالاكی تری بادینان دادگایی دەكرێن بە تۆمەتی تێكدانی ئاساییشی هەرێمی كوردستان“.
بەشدار حەسەن پارێزەری دەستگیركراوانی بادینان لە کۆنفرانسێکی رۆژنامەنوسيدا رايگەياند: “لە دادگای تاوانی ئاساییشی هەولێر دوو دۆسیەی ژمارەیەكی تری رۆژنامەوانان و چالاكانی بادینان رەوانەی دادگای تاوانەكانی هەولێر كراوە”.
وتيشی “دۆسێیەكیان پێنج كەسن و دۆسیەكەی تریان چوار كەسن، بەناوی کاسب نوسراون بەڵام لە بنەڕەتدا چالاکوان و رۆژنامە نووسن”، دەشڵێت “بەو مادەیە دادگایی دەكرێن كە شێروان شێروانی و ئەوانی لەسەر دادگاییكرا”.
راشيگەياند: “بێ هيوا بوين لە بينينی ئەو پێنج رۆژنامەنوسەی دەستگيرکراون چونکە هەرجارەو بە بيانويەک رێگریمان لێ دەکرێت”، باسی لەوەشکرد “بەبيانوی ئەوەی بينای بەڕێوبەرايەتی چاکسازی گەوران تەواو نەبووە ئەو سزادراوانە تا ئیستا لە ئاسايشی هەولێرن”.
