24  ملیۆن دۆلار لە سامانی عێراق لە ئەڵمانیاوە گەڕێندرایەوە

SNN

وەزارەتی دەرەوەی عێراق رایگەیاند بڕی 24 ملیۆن دۆلار کە بەشێوەی نایاسایی برابووە دەرەوەی وڵات توانراوە دەستی بەسەردا بگیرێت و بگەڕێندرێتەوە سەر سامانی دەوڵەت.

وەزارەتی دەرەوەی عێراق لە راگەیەندراوێکیدا بڵاویکردووەتەوە، هەوڵەکان چڕکراونەتەوە بۆ گەڕاندنەوەی سامانی عێراق کە لە رابردوودا بەشێوەی  نایاسایی براوەتە دەرەوەی وڵات، لەو چوارچێوەیەشدا 24 ملیۆن دۆلار لە ئەڵمانیا دەستی بەسەرداگیراوە.

دەشڵێت: کۆمپانیا عێراقییەکان و باڵیۆزخانەکانی عێراق لە وڵاتان هاوکاردەبن لە گەڕاندنەوەی سامانی دزەپێکراوی عێراق لە وڵاتان.

لەوبارەیەوە ئەندامێکی لیژنەی دەستپاکی عێراق بە میدیای فەرمی وڵاتەکەی وتووە: بەشێکی زۆری ئەو سامانەی کە بە گەندەڵی براوەتە دەرەوە لە شاری کانس لە فەڕەنسا کۆشک و تەلاریان پێکڕدراوە، بەشێکی دیکەش لە بەریتانیا, سویسرا و وڵاتانی دیکەی ئەوروپی و عەرەبی موڵکیان پێکڕدراوە. چەندین کارگە هەیە لە ڤیەتنام و سینگاپورە کە بە سامانی عێراق کڕدراون.