هەفتانە 50 رۆژنامەنووس لە سلێمانی دەتوانن ژەمە ڤاکسینی کۆرۆنا وەربگرن
SNN
لقی سلێمانی سەندیکای رۆژنامەنووسانی کوردستان رایگەیاند: لەهەفتەی داهاتووەوە لەهەفتەیەکدا 50 رۆژنامەنووس کە پێناسی سەندیکای رۆژنامەنووسانیان هەبێت دەتوانن لە یەکێک لە بنکە تەندروستییەکانی شارەکە ژەمە ڤاکسینی کۆرۆنا وەربگرن.
لقی سلێمانی سەندیكای رۆژنامەنووسان رایگەیاند: “پاش رەزامەندی بەرێوەبەرێتی تەندروستی سلێمانی لەسەر نووسراوی لقەكەیان بەدابینكردنی ڤاكسینی دژە كۆرۆنا بۆ رۆژنامەنووسان، بنكەی تەندروستی بەختیاری وەك بنكەیەكی كوتانی ئاسایی، دابینكرا تا رۆژنامەنووسانیش بتوانن بەخستنەڕووی پێناسەكانیان هەفتانە 50 ئەندامی لقەكەیان ڤاكسین وەربگرن”.
بەپێی نوسراوەکەی لقی سلێمانی بەپێی ئەم مەرجانەی خوارەوە رۆژنامەنووسان لەهەفتەی داهاتوو دەتوانن ڤاکسین وەربگرن:
- مەرجە رۆژنامەنووس پێناسەكەی لقی سلێمانی سەندیكای رۆژنامەنووسانی پێبێت.
- مەرجە لە ئەپلیكەیشنی (Kurdvac) ناوی خۆی تۆمار بكات و زانیاریی داواكراو تۆماربكات.
- مەرجە لە ئەپلیكەیشنەكەدا بنكەی تەندروستی (بەختیاری) لە شاری سلێمانی هەڵبژێرێت.
- هەفتانە لە یەك شەممەوە تا چوارشەممە (50) پەنجا ئەندامی لقمان ڤاكسین وەردەگرن..
- پێویست ناكات چاوەڕوانی وەڵامدانەوەی ناوەكەی بكات، تەنها ناوەكەی لەلیستی بنكەكەو لە رێی ئەپڵیكەیشنی (كوردڤاك) دا تۆماركرابێت، بەسە بۆ وەرگرتنی یەكەم ژەمی ڤاكسینەكە.
