لە چالاکییەکی تایبەتدا پێشمەرگەو هێزێکی فەرەنسی هەشت چەکداری داعش دەکوژن
وێنەیەکی هێزەکانی پێشمەرگە
SNN
بەرەبەیانی ئەمڕۆ چوارشەممە، هێزی پێشمەرگە و هاوکات هێزێکی فەرەنسی، لە چوارچێوەی سوپای هاوپەیمانانادا چالاکییەکیان لە قەزای دوزخورماتوو ئەنجامدا و تێیدا هەشت چەکداری داعشیان کوشت.
سەرچاوەیەک لە وەزارەتی پێشمەرگەوە رایگەیاند: چالاکییەکە کاتژمێر سێ-ی بەرەبەیان بووە لە گوندەکانی “زینانە” و “داودە”، لەگەڵ کوژرانی هەشت چەکدارەکەی داعشدا توانراوە ئۆتۆمبێل و ماتۆرسکیل و کەل و پەل و پێداویستییەکانیشیان تێک بشکێنرێت.
ناوچەکانی زینانە و داودە ماوەی ساڵێک دەبێت دووبارە چەکدارانی داعش خەریکە خۆیانی تێدا تۆکمە دەکەنەوە و بەردوامیش بوونەتە مۆڵگەیەک کە لە ڕێگەیەوە هێرش دەکەنە سەر هاووڵاتیانی مەدەنی و دەیانڕفێنن و دواتریش بە بڕە پارەیەکی زۆر بەریان دەدەن یاخود دەیانکوژن، لەگەڵ ئەوەشدا بەهۆی ئەوەی ئەم ناوچانە کێشە لەسەر لەژێر کۆنترۆڵی تەواوی پێشمەرگە یاخود سوپادا نین.
