فڕۆکەکانی تورکیا ئۆتۆمبێلێکیان لە شارباژێڕ کردە ئامانج

SNN

قایمقامی ماوەت رایگەیاند: “فڕۆکەکانی تورکیا ئۆتۆمبێلێکیان لە گوندی گەڵاڵەی سەر بە شارباژێڕ لە پارێزگای سلێمانی کردوەتە ئامانج و هێرشەکە زیانی گیانی لێکەوتوەتەوە”.

کامەران حەسەن قایمقامی ماوەت بە SNNی راگەیاند: ک”اتژمێر و 6 و 40 خولەکی ئێوارەی ئەمڕۆ شەممە فڕۆکەکانی تورکیا لە گوندی گەڵاڵە ئۆتۆمبێلێکیان کردوەتە ئامانج”.

وتیشی: “دانیشتوانی گوندەکە لەو هێرشەدا هیچ زیانێکیان بەرنەکەوتووە، بەڵام گەریلاکانی پەکەکە کوژراو و برینداریان هەیە”.

روونیشیکردەوە: “ئەو گەریلایانەی پەکەکە لە ناو ئۆتۆمبێلێکی مەدەنیدا بوون و تائێستا نازانرێت چەند کەس لەو ئۆتۆمبێلەدابوون، بەڵام بە ئەگەری زۆر دوو کەسی تێدابووە”.

فڕۆکە جەنگی و فڕۆکە بێفڕۆکەوانەکانی سوپای تورکیا تائێستا چەند جارێک بە پاساوی بوونی بنکە و بارەگاکانی پەکەکە سنوری چەند گوندێکی شارباژێڕیان کردوەتە ئامانج و ساڵی رابردووش لە هێرشێکدا چەند هاووڵاتییەکی مەدەنی هەرێم لە نزیک کونەماسی بە سەختی برینداربوون.