ئیدارەی خۆسەری رۆژئاوا: کەناڵێکی پارتی هانی شەڕی کورد و کورد دەدات
SNN
ئیدارەی خۆسەری باکوور و رۆژئاوای سوریا لە راگەیەندراوێکدا رەخنەی لە کەناڵی کوردستان 24 گرتووە و تۆمەتباریکردووە بەوەی “هانی هەڵگیرسانی شەڕی نێوان کورد و کورد دەدات (پەکەکە و هێزەکانی نزیک لە پارتی)”.
لە راگەیەندراوێکدا هاتووە: “ئەو سیاسەتە میدیایەی کە کەناڵی کوردستان ٢٤ گرتوویەتیەبەر کارکردنە لەسەر بڵاوکردنەوەی وتاری پڕلە ڕق و کینە و بڵاوکردنەوەی دووبەرەکی لەنێوان تاکەکانی گەلی کورد و هاندان بۆ شەڕی نێوان کورد و کورد، ئێمە پێمانوایە ئەوە پێشێلکاری ئەو پرەنسیپە ئەخلاقیەیە کە دەبێت میدیاکان پێوەی پابەندبن”.
بەڕێوەبەرایەتییەکە راشیگەیاندووە کە مۆڵەتی کارکردنی ئەو کەناڵە لە رۆژئاوای کوردستان هەڵدەوەشێنێتەوە و هۆکارەکەشی بۆ بڵاوکردنەوەی رق و توندوتیژی دەگەڕێنێتەوە.
