کۆمسيۆن وادەی تيروپشکی ژمارەی کانديدەکانی هەڵبژاردنی راگەياند
SNN-عەلی حەمە سەعید
كۆمسیۆنی باڵای سەربەخۆی هەڵبژاردنەكانی عێراق رايگەياند: “رۆژی 7/5 بەسیوەی تيروپشک دەستدەکرێت بە پێدانی ژمارەی کانديدەکانی هەڵبژاردن”، هاوكات داوا لە سەرجەم نوسینگەكانی كۆمیسیۆنی هەڵبژاردن دەکات پێداویستییەكان ئامادەبكەن.
بە گوێرەی نوسراوێكی فەرمی كۆمسیۆنی باڵای سەربەخۆی هەڵبژاردنەكانی عێراق كە وێنەیەكی دەست SNNكەوتووە ئەوە خراوەتەڕوو: “بە مەبەستی جێبەجیكردنی بڕیارەكانی تایبەت بە بەڕێوەچوونی هەڵبژاردنی پێشوەختەی عێراق، بڕیاردراوە كە لە رۆژی ( 5/7) بە شێوەی تیروپشك دەستبكرێت بە بەخشینی ژمارەی تایبەت بە كاندیدەكانی هەڵبژاردنی پێشوەختەی عێراق كە وابڕیارە لە 10/10/2021 بەڕێوەبچێت”.
هەر لەو نوسراوەدا ئاماژە بەوەشكراوە: “پڕۆسەی پێدانی ژمارە بە كاندیدەكان و بەڕێوەچوونی مەراسیمی تیروپشك لە نووسینگەكانی كۆمسیۆن لە سەرجەم پارێزگاكان ئەنجامدەدرێت، بۆ ئەومەبەستەش داوا لە نووسینگەكان كراوە كە هەموو پێداویستییەكانی خۆیان بۆ ئەو رۆژە ئامادە بكەن”.
بە گوێرەی زانیارییەكانی SNN لە دوای كۆتایی هاتن بە پڕكردنەوەی فۆڕمی تایبەت بە كارمەندانی رۆژی هەڵبژاردن لە 1/8/2021، لە مەراسیمێكی تایبەتدا بە شێوەی تیروپشكی ئەلیكترۆنی كۆمیسیۆنی ناوی ئەو كەسانە رادەگەیەنێت كە ناویان وەك چاودێر و بەڕێوەبەری وێستگەكانی هەڵبژاردن دەرچووە.
