روونكردنەوەیەك لە وەزارەتی داراییەوە سەبارەت بە دەسەڵاتی هەڵوەشاندنەوەی بڕوانامە

SNN

وەزارەتی دارايی رايگەياند: “وەزارەتەکەمان دەسەڵاتی هەڵوەشاندنەوەی هیچ بڕوانامەیەكی نییە، ئەو گشتاندنەی بڵاومانکردووەتەوە بۆ ئەو کەسانەيە بەدەر لە ياسا بڕوانامەيان بەدەستهێناوە”.

وەزارەتی دارايی و ئابووری لە راگەيەندراوێکدا بڵاويکردەوە: “پاڵپشت بە یاسای چاكسازی و لە موچە و دەڕماڵە بە ژمارە (2) ساڵی 2020 و بە نوسراوی(ئەنجومەنی وەزیران- سەرۆكایەتی دیوانی ئەنجومەنی وەزیران) بە ژمارە (2874) كە بەرواری 7/3/2021 ئاراستەی وەزارەتی دارایی و ئابوری كردووە، باس لە چاوخشاندن بەسەرجەم مووچە و دەڕماڵەی  بەخشین و ئیمتیازاتەكانی فەرمانبەران دەكات، بەو پێیە وەزارەتی دارايی و ئابووری بە گشتاندنی ژمارە (7)  بۆ گشت وەزارەت و فەرمانگەكانی نەبەستراو بە وەزارەت گشتاندنی دەركردووە هەر بۆیە دەمانەوێت ئەم روونكردنەوەیە بڵاوبكەینە”:

يەکەم- گشتاندنەكە ئەو فەرمانبەرانە دەگرێتەوە كە خوێندنی بەیانیان یان لە دەرەوەی وڵات بە بێ مۆڵەتی خوێندن بە دەر لە یاسا و رێنمایە بەركارەكان، بڕوانامەیان بە دەستهێناوە.

دووەم- هەمواركردنەوەی بڕوانامەی ئەوانەی لە سەرەوە ئاماژەمان پێداوە لێكەوتە داراییەكانی هەمواركردنی بڕوانامەكانیان هەڵدەوەشێتەوە.

سێيەم- وەزارەتی دارایی و ئابووری دەسەڵاتی هەڵوەشاندنەوەی هیچ بڕوانامەیەكی نییە.

4- لە رۆژانی داهاتوو ڕوونكردنەوەی یاسایی تایبەت بەو بڕیارە لە ئەنجومەنی وەزیرانەوە بە فەرمی دەردەچێت.

بەپێی نوسراوێکی وەزارەتی دارايی و ئابووری کە واژۆی ئاوات شێخ جەناب وەزيری دارايی لەسەرە و رێکەوتی مانگی شەشی ئەمساڵی پێوەيە: “هەر بڕوانامەیەک بەبێ مۆڵەتی خوێندن بەدەستهاتبێت هەڵدەوەشێتەوە”.