کۆمەڵەی خانەنشینان: لە دوو ساڵدا سێ خانەنشین لە کاتی وەرگرتنی مووچەدا گیانیان لەدەستداوە

SNN

سەرۆکی کۆمەڵەی خانەنشینانی کوردستان رایگەیاند: “لە دوو ساڵی رابردوودا سێ خانەنشین لە کاتی سەرەگرتن بۆ موچە گیانیان لەدەستداوە” و داواشدەکات: “شوێنێکی شایستە بۆ وەرگرتنی موچەی خانەنشینان دیاری بکرێت”.

ئەمڕۆ لە کاتی وەرگرتنی موچەی خانەنشینی لە بانکی تانجەرۆی شاری سلێمانی خانەنشینێک بە هۆی پاڵەپەستۆوە باری تەندروستی تێکچوو، هەر بەو هۆیەشەوە گیانی لەدەستدا.

لەو بارەوە، ئەحمەد هەورامی سەرۆکی کۆمەڵەی خانەنشینانی کوردستان بە SNN راگەیاند: “خانەنشینان لە دۆخێکی خراپدان و لە ماوەی دوو ساڵدا سێ خانەنسین لە کاتی سەرەگرتن بۆ موچەی خانەنشینی گیانیان لەدەستداوە”.

داواشی لە حکومەت و لایەنە پەیوەندیدارەکان کرد: ” چاو بە دۆخی خانەنشیناندا بخشێننەوە و بارودۆخی ژیانیان لەبەرچاوبگرن و لە شوێنێکی باش و شایستەدا موچەکانیان بەسەردا دابەش بکەن”.