لە دوو ساڵی رابردوو 14 هەزار هێڵی زێدەڕۆی کارەبا بڕدراوە

SNN

وەزارەتی کارەبا لە ماوەی دوو ساڵی رابردوودا توانیویەتی نزیکەی 14 هەزار هێڵی کارەبای زێدەرۆیی ببڕێت. لە هەمان کاتدا بەستنی پێوەری زیرەک، رێگایەکی دیکەیە بۆ کۆنترۆڵکردنی کارەبا و تا ئێستا لە کۆی یەک ملیۆن و 600 هەزار هاوبەشی کارەبا، 800 هەزار پێوەری زیرەک بەستراوە.

ئومێد ئەحمەد، وتەبێژی وەزارەتی کارەبا بە میدیای پارتی راگەیاند: “لە ماوەی دوو ساڵدا توانیومانە 13 بۆ 14 هێڵی سەرپێچی سەر تۆڕەکانی کارەبا ببڕین، جگە لەوەش لەگەڵ دانانی پێوەری زیرەک لە هەر شوێنێک کۆتایی بە حاڵەتەکانی زێدەڕۆیی دێنین”.

وتیشی: “تائێستا 800 هەزار پێوەری زیرەک بۆ هاوبەشانی کارەبا بەستراوە، ئەمەش کاریگەری هەبووە بۆ گەڕانەوەی وزەی کارەباوە”.

پرۆسەی بنبڕکردنی کارەبای زێدەڕۆ بەردەوامە، ئەگەر ڤایرۆسی کۆرۆنا و رێکارەکانی خۆپارێزی سەختی باری دارایی یەک ساڵی رابردوو نەبوایە، زیاتر لەو ژمارەیە کارەبای زێدەرۆ دەبڕدرا.