قەدەغەی هاتوچۆ لە چەند شارێکی عێراق رادەگەیەندرێت

SNN

وەزارەتی تەندروستی عێراق رایگەیاند: لە چوارشەممەی داهاتووەوە تا دوو هەفتە قەدەغەی هاتوچۆی لە چەند شار و شارۆچکەیەکی سەر بە پارێزگای بەغدا جێبەجێ دەکرێت.

بە گوێرەی راگەیەندراوێک کە واژۆی حسێن محەمەد وەزیری تەندروستی و ژینگەی عێراقی لەسەرە بڵاوکراوەتەوە: “لە 20ی ئایارەوە تا دوو هەفتە لە شارەکانی سەدر، حەبیبیە، حوریە، کەمالیە، شوعلە و عامریە، قەدە‌ەی هاتوچۆ جێبەجێ دەکرێت”.

ئاماژەی بەوەشکردووە: “ژمارەی تووشبووان بە کۆرۆنا لەو شارانەی قەدەغەی هاتوچۆ تیایاندا راگەیەندراوە زیادیانکردووە، هەرکاتێکیش کە ژمارەی تووشبووان لە شوێنەکانی دیکەی بەغدا بەرزتربووەوە قەدەغەی هاتوچۆ رادەگەیەندرێت”.

وەزیری تەندروستی و ژینگەی عێراق داوای لە هاووڵاتیان کردووە هەست بە بەرپرسیارێتی بکەن و پابەندبن بە رێکارە تەندروستییەکانی خۆپارێزی لە کۆرۆنا.

تا ئێستا سێ هەزار و 404 حاڵەتی تووشبوون بە کۆرۆنا لە عێراق تۆمارکراوە، لەو ژمارەیەش دوو هەزار و 218 کەس چاکبوونەتەوە و 123 کەسیش گیانیان لەدەستداوە.