“ئەوەی خۆی بە يەکێتی بزانێت دەنگ بە مەبدەئی يەکێتی دەدات نەک شەخس”

SNN-عەلی حەمە سەعید

لەگەڵ نزیك بوونەوە لە هەڵبژاردنەكانی پەرلەمانی عێراق و خۆ ئامادەكردنی لیستی هاوپەیمانی بۆ بەشداریكردن لەو هەڵبژاردنە، ئەندامێكی ئەنجومەنی باڵای پێشمەرگە دێرینەكان لەسەر پشكی یەكێتی ئاماژە بەوە دەكات ئەو قوربانی و شەهیدانەی ئێمە داومانە لە پێناو كوردستان و مانەوەی یەكێتیدا بووە و ئەوكەسانەشی بەڕاستی خۆیان بەیەكیتی دەزانن دەبێت دەنگ بە مەبدەئی یەكێتی بدەن نەك بەشەخس.

عوسمان سێدەری، ئەندامی ئەنجومەنی باڵای پێشمەرگە دێرینەكان لەسەر پشكی یەكێتی بەSNN ی ڕاگەیاند: پێم سەیرە كاتێك كە هەرچی سەركردە و بەرپرسی بالای یەكێتی هەیە بەهۆی ڕێبازی یەكێتی و مام جەلالەوە دروستبووە، ئەگەر كەسێك بەڕاستی یەكێتییە دەبێت دەنگ بە مەبدەئی یەكێتی بدات نەك شەخس و كەسێكی دیاریكراو.

ئاماژەی بەوەشكرد: “ئێمە بە درێژایی مێژوو بەوجۆرە كارمان كردووە كە وتە گرنگەكەی (مام جەلال)مان كردووەتە بەرنامەی ژیانمان كە دەڵێت” مانەوەمان و سەروەریمان بەندە بە یەكێتی نشتیمانی كوردستانەوە” بەراستیش وایە چونكە ئەو كەسانەی كە ئێستا لە ئاستێكی باڵادان و شانازی بەخۆیان و بەدەوروبەرەكەیانەوە دەكەن هەر بە هۆی یەكێتییەوە بووە ئەو ناوبانگەیان بەدەست هێناوە و بوونەتە كەسانی ناسراو، دەبێت ئەوانیش بەوەفا بن بەرامبەر بە ڕێبازەكەی مام جەلال و یەكێتی نشتیمانی كوردستان”.

ئەو ئەندامەی ئەنجومەنی بالای كۆمەڵەی پێشمەرگە دێرینەكان جەختی لەوەشكردەوە: “ئەو كەسانەی كە شوێن سۆز و عاتیفە كەوتوون خۆیان بە یەكێتی دەزانن دەبێت بە ئاگا بێنەوە و بزانن كە ئەوان تەنها یەكێتیان لا مەبەست بێت نەك شەخس و بەرژەوەندی تایبەتی، ئەمە ڕێگا دروستیەكە بۆ ئەوەی بەهەموومانەوە بتوانین درێژە بە مانەوەی یەكێتی بدەین و یەكێتی بۆ بەرژەوەندی تایبەتی خۆمان بەركا نەهێنین”.