چين:پەيوەندييەکانمان لەگەڵ حکومەتی نوێی ئەفغانستان دەپارێزين

SNN

چین كە یەكێكە لە پێنج ئەندامە سەرەكییەكەی ئەنجومەنی ئاسایشی نێودەوڵەتی ڕایگەیاند: “ئامادەیە پەیوەندییەکان لەگەڵ ڕابەرانی حکومەتە نوێیەکەی ئەفغانستاندا بپارێزێت، وتیشی پێکهاتنی ئەو حکومەتە هەنگاوێکی گرنگە  بۆ دووبارە بونیادنانەوەی ئەو وڵاتە”.

وانگ وێنبین وتەبێژی وەزارەتی دەرەوەی چین لە کۆنفرانسێکی ڕۆژنامەوانیدا رايگەياند: “ڕێز لە سەروەری و سەربەخۆیی ئەفغانستان دەگرين، دوای ئەوەی تاڵیبان ئەفغانستانی کۆنتڕۆڵکردەوە، داوای حکومەتێکی کراوە و نوێمان لە ئەفغانستان کردووە”.

وانگ وێنبین وتیشی “هیوادارین بەرپرسانی نوێی ئەفغانستان گوێ لە سەرجەم هاووڵاتیانی ئەفغانی بە هەموو ڕەگەز و لایەنەکانەوە بگرن تاوەکو ئاواتی خەڵکەکەی خۆی و کۆمەڵگەی نێودەوڵەتی بهێننەدی”.

ڕۆژی سێشەممە تاڵیبان پۆستە باڵاکانی حکومەتەکەی بە بەرپرسە باڵاکانی پڕکردەوە، یەکێک لە دامەزرێنەرانی تاڵیبان وەکو سەرۆکی حکومەت دەستنیشانکرا و وەزیری ناوخۆش لەژێر سزاکانی ئەمەریکادایە.