چوار بەرپرسی سەردەمی ترەمپ بانگهێشتی دادگا دەکرێن

SNN

کۆمیتەی ئەنجوومەنی نوێنەرانی ئەمریکا کە بەرپرسیارە لە لێکۆڵینەوەی رووداوەکانی هەڵکوتانە سەر بینای کۆنگرێس لە شەشی کانوونی دووەمدا، ئاشکرای کرد، کە چوار بەرپرسی سەردەمی دەسەڵاتەکەی ترەمپ-ی بانگهێشت کردوە بۆ ئەوەی وتەیان لێ وەربگیرێت.

لەوبارەیەشەوە کۆمیتەکە راگەیەندراوێکی بڵاوکردوەتەوە و تیایدا ئەوە خراوەتەڕوو، کە مارک مێدۆوس، بەرپرسی پێشووی نووسینگەی تایبەتی کۆشکی سپی، دانییەل سکاڤینۆ، یاریدەدەری پێشووی بەرپرسی نووسینگەی کۆشکی سپی و بەرپرسی پەیوەندییەکان، کاشیاپ پاتێل بەرپرسی پێشووی وەزارەتی بەرگری و ستێفان باننۆن، راوێژکاری پێشووی ترەمپ، داوایان لێکراوە لە رۆژانی 14 و 15ی تشرینی یەکەمدا دەربارەی رووداوەکانی ناو بینای کۆنگرێس و هەوڵی کودەتا، ئیفادە بدەن.

لە راگەیەندراوەکەدا ئەوەش باس کراوە کە دەنگۆی ئەوە هەیە ئەو چوار کەسە لە شەشی کانوونی دووەم و رۆژانی پێشتردا لەبارەی هێرش کردنە سەر بینای کۆنگرێس و گۆڕینی ئەنجامی هەڵبژاردنەکان، لەگەڵ دۆناڵد ترەمپ لە پەیوەندیدابووبێتن.

دوای راگەیاندنی ئەنجامەکانی هەڵبژاردنی سەرۆکایەتی ئەمریکا، ژمارەیەک لایەنگری ترەمپ لە شەشی کانونی دووەمی ئەمساڵدا هەڵیانکوتایە سەر بینای کۆنگرێس و لەو رووداوەدا چەند کەسێک کوژراون.