راوێژکارێکی کازمی یەکەم ئەرکی حکومەتی داهاتووی عێراق ئاشکرادەکات

SNN

راوێژکارێکی کازمی دەڵێت یەکەم ئەرکی حکومەتی نوێی عێراق هەموارکردنەوەی یاسای بودجە دەبێت.

موزھه‌ر محەمەد ساڵح راوێژکاری ئابوریی مسته‌فا كازمی وتی: یەکەم ئەرکی حکومەتی نوێی عێراق، ھەموارکردنەوەی یاسای بودجە دەبێت و بە پێی بازاڕی نەوت گۆڕانکاری لە بەھای دۆلاردا دەکرێت.
هاوکات ئەوەشی خستەڕوو: كه‌ ڕەشنووسی پڕۆژە یاسای بودجەی 2022 لە لایەن وەزارەتی دارایی و ئابووریەوە ئامادەکراوە، بەڵام بەھۆی ھەڵوەشاندنەوەی ئەنجومەنی نوێنەرانەوە ڕێکارە یاساییەکانی دواکەوتووە و لە ئێستادا چاوەڕوانی پێکھێنانی حکوومەتی نوێ دەکەن.
ڕاشیگەیاند: حکومەتی نوێ تاوتوێی یاسای بودجە دەکات و گۆڕانکاری تێدا دەکات، کە ڕەنگە لە کاتی گفتوگۆکاندا بە پێی بازاڕی نەوت بەھای دۆلار گۆڕانکاری تێدا بکرێ و نرخی دۆلار به‌رامبه‌ر دینار دابه‌زێنرێت.
وتیشی: ئەگەر پڕۆژە یاسای بودجەی ساڵی داھاتوو، دوا بکەوێت ئەوا بە پێی یاسای 1 لەسەر 12، خەرجییەکان لەسەر بنەمای بودجەی 2021 ڕێکدەخرێن.