كارگێڕێكی مەكتەبی سیاسیی یەكێتی گرفتی بەشی فریاكەوتنی نەخۆشخانەی شاری چارەسەركردووە

SNN-عەلی حەمە سەعید
لێپرسراوی ڕاگەیاندن و پەیوەندییەكانی بەڕێوەبەرایەتی گشتیی تەندروستی سلێمانی ئاماژە بەوەدەكات دوای ئەوەی لەلایەن وەزارەتی تەندروستییەوە بودجەی پێویست بۆ دەرمان و سوتەمەنی ئۆتۆمبێلەكانی فریاكەوتن دابیننەكراو گرفتیان بۆ دروستبوو، بەڵام بۆماوەی مانگێك لەسەر ئەركی كارگێڕی مەكتەبی سیاسی یەكێتی ئەو گرفتە چارەسەر كراوە.

سامان شێخ لەتیف، لێپرسراوی ڕاگەیاندن و پەیوەندییەكانی بەڕێوەبەرایەتی گشتی تەندروستی سلێمانی بە SNNی ڕاگەیاند: ئەو گرفتەی كە بۆ ئۆتۆمبێلەكانی فریاكەونی سلێمانی دروستبوو لە چەند ڕۆژی ڕابردوودا بەهۆی نەبوونی سوتەمەنی بۆ ئەو ئۆتۆمبێلانە نەدەتواندرا وەك پێویست كارەكانیان ڕابپەڕێنن ئەوەش بەهۆی ئەوەی لەلایەن وەزارەتی تەندروستیەوە بودجەی پێویست تەرخاننەدەكرا.

ئاماژەی بەوەشكرد، بۆچارەسەركردنی ئەو گرفتە شاناز ئیبراهیم ئەحمەد، كارگێڕی مەكتەبی سیاسی یەكێتی نشتیمانی كوردستان بڕی 180 ملیۆن دینار بۆبەڕێوەبەرایەتی گشتی تەندروستی سلێمانی دابین كرد بەجۆرێك كە
بڕی 100 میلۆن دینار بۆ نەخۆشخانەی شاربەمەبەستی كڕینی دەرمان و پێداویستی پزیشكی خەرجبكرێت و هاوكات بڕی 80 ملێون دیناریش بۆ كڕین و دابینكردنی سوتەمەنی بۆ ئۆتۆمبێلەكانی فریاكەوتنی نەخۆشخانەكان دابیندەكرێت.

لێپرسراوی ڕاگەیاندن و پەیوەندییەكانی بەڕێوەبەرایەتی گشتی تەندروستی سلێمانی، ئەوەشی خستەڕوو، لەئێستادا بۆماوەی یەك مانگ گرفتی نەبوونی سوتەمەنی بۆ ئۆتۆمبێلەكانی فریاكەوتنی سلێمانی چارەسەركراوە و ئەو هەنگاوەی كارگێڕی مەكتەبی سیاسی یەكێتی خزمەتكیكی زۆر بەكەرتی تەندرستی دەكات لە سنورەكەدا.