“له چه‌ند رۆژى داهاتوودا به‌سته‌ڵه‌كى سیاسى عێراق ده‌شكێت”
كۆبوونه‌وه‌ى سه‌ركرده‌كانى چوارچێوه‌ى هه‌ماهه‌نگى | فۆتۆ: BT
SNN
سه‌ركرده‌یه‌كى چوارچێوه‌ى هه‌ماهه‌نگى رایده‌گه‌یه‌نێت، ئه‌گه‌رى هه‌یه له چه‌ند رۆژى داهاتوودا به‌سته‌ڵه‌كى سیاسى له عێراق بتوێته‌وه، ده‌شڵێت: “پێویسته به‌رژه‌وه‌ندى نیشتمانى پێش به‌رژه‌وه‌ندى سیاسى بخرێت”.
عه‌بدولئه‌مری مه‌یاحى، سه‌ركرده له چوارچێوه‌ى هه‌ماهه‌نگى ئه‌مڕۆ یه‌كشه‌ممه به میدیاكانى عێراقى راگه‌یاند، “گرنگه هه‌موو هێزه سیاسییه‌كان به‌رژه‌وه‌ندى نیشتمانى پێش به‌رژه‌وه‌ندى سیاسى بخه‌ن بۆ ئه‌وه‌ى كۆتایی به‌و بنبه‌سته سیاسییه بێت كه ئێستا له عێراق هه‌یه و بووه‌ته هۆكارى ئه‌وه‌ى حكومه‌تى نوێ پێكنه‌هێنرێت”.
وتیشى: “له چه‌ند رۆژى داهاتوودا پێشبینى ده‌كه‌ین به‌سته‌ڵه‌كى سیاسى له عێراق بتوێته‌وه و گه‌شه‌سه‌ندنى نوێ له دۆخى سیاسى عێراقدا بێته‌ئاراوه، به‌تایبه‌ت كه په‌رله‌مانتاره‌كان گه‌یشتوون به‌و بڕوایه‌ى كه ده‌ستپێشخه‌رییه‌كه‌ى چوارچێوه‌ى هه‌ماهه‌نگى ده‌كرێت دۆخى سیاسى عێراق بگۆڕێت”.
ئه‌و سه‌ركرده‌یه‌ى چوارچێوه‌ى هه‌ماهه‌نگى ئه‌وه‌شى خسته‌ڕوو، “له چه‌ند رۆژى داهاتوودا گفتوگۆكانى پێكهێنانى حكومه‌ت ده‌گه‌ن به ئه‌نجامى نوێ”.
