فەرمانبەرێكی مەرزی نێودەوڵەتی باشماخ لە ناو بیرێكی ئاودا خنكا

SNN-عەلی حەمە سەعید
لە ئەنجامی كەوتنە ناو بیرێكی حەفری ئاو لە گوندی تەپەگوڵاوی سەر بەناحییەی سیروانی سەر بەپارێزگای هەڵەبجە، فەرمانبەرێكی هۆبەی یاسایی لە مەرزی نێودەوڵەتی باشماخ خنكا، هاوكات بەمەبەستی لیكۆڵینەوەی زیاتر لە هۆكاری گیان لەدەستدانی تەرمەكەی ڕەوانەی پزیشكی دادی هەڵەبجەكراوە و پۆلیسیش پەراوی لێكۆڵینەوەی بۆ ڕێكخستووە.

موقەدەم بەرزان عوسمان، وتەبێژی پۆلیسی پارێزگای هەڵەبجە بە SNNی ڕاگەیاند: سەرلەئیوارەی ئەمڕۆ پێنج شەمە 14/7/2022 هاوڵاتییەك بەناوی ( هەورامان عمر عەبدوڵا) كە تەمەنی 38ساڵە لەئەنجامی كەوتنە ناو بیرێكی ئاوی حەفر كە بۆ كاری كشتوكاڵی بەكاردێت خنكا.

ئاماژەی بەوەشكرد، ئەو هاووڵاتییەی كە لەناو ئەو بیرەدا خنكا دانیشتووی گوندی تەپەگوڵاوی سەر بەناحییەی سیروانی سەر بەپارێزگای هەڵەبجەیە و پیشەی فەرمانبەرە لە دەروازەی مەرزی نێودەوڵەتی باشماخ .

وتەبێژەكەی بەڕێوەبەرایەتی پۆلیسی پارێزگای هەڵەبجە ئەوەشی خستەڕوو، پاش دەرهینانەوەی تەرمەكەی ڕەوانەی پزیشكی  دادی هەڵەبجە كراوە هاوكات لە بنكەی پۆلیسی ناحیەی سیروان دۆسیەی لێكۆڵینەوە بۆ ڕوداوەكە ڕێكخراوە.