ههموو هێزهكانى توركیا لهناو خاكى عێراق دهكهینهدهرهوه
ئهحمهد سهحاف، وتهبێژى وهزارهتى دهرهوهى عێراق | فۆتۆ: Iraq Gov
SNN
وتهبێژى وهزارهتى دهرهوهى عێراق رایدهگهیهنێت، بهڵگهى حاشاههڵنهگرمان لایه كه توركیا سهیرانگاى پهرخى له زاخۆ بۆردومان كردووه، دهشڵێت: “پلانمان ههیه و دهمانهوێت ههموو هێزهكانى توركیا لهناو خاكى عێراق بكهینهدهرهوه”.
ئهحمهد سهحاف، وتهبێژى وهزارهتى دهرهوهى عێراق له نوێترین لێدوانى رۆژنامهوانیدا رایگهیاند،”بهڵگهى حاشاههڵنهگرمان لایه كه توركیا سهیرانگاى پهرخى له زاخۆ بۆردومان كردووه ئهمهش بێ وهڵام نابێت. پلانمان ههیه و دهمانهوێت ههموو هێزهكانى توركیا لهناو خاكى عێراق بكهینهدهرهوه. ئێمه چهندین كارتى فشارمان ههیه و دهستهوسان راناوهستین”.
وتیشى: “ئێمه ئهم پرسه دهبهینه بهردهم كۆمهڵگهى نێودهوڵهتى. پارتى كرێكارانى كوردستان كێشهیهكى گهورهیه بۆ حكومهتى عێراق كه رژێمى پێشوو خولقاندوویهتى و رێگهى پێداون لهنێو خاكى عێراق بمێننهوه. كێشهى توركیا و پهكهكه كێشهیهكى هاوردهكراوى ئهمنییه بۆ عێراق “.
وتهبێژى وهزارهتى دهرهوهى عێراق ئهوهشى خستهڕوو، “زۆركات باسى ئهوه دهكرێت كه توركیا رێككهوتنى لهگهڵ حكومهتى عێراق ههیه بۆ ئهوهى ئۆپراسیۆنى سهربازى لهناو خاكى ئێمه ئهنجام بدات، ئهم بابهته بابهتێكى جیاوازه، چونكه بهپێى ئهو رێككهوتنانهى كه رژێمى بهعس لهگهڵ توركیا كردوونى پێویسته توركیا به ئاگادارى ئێمه ئۆپراسیۆن بكات، بهڵام توركیا بهبێ ئاگادارى ئێمه ئهم ههموو هێرشه ئهنجام دهدات”.
به وتهى ئهحمهد سهحاف، “تهواوى ئهو رێككهوتنانهى لهنێوان عێراق و توركیا كراون هى رژێمى پێشوون و هیچ رێككهوتنێكى نوێ لهنێوان ئهو دوو وڵاته لهدواى پرۆسهى ئازادى عێراق ئهنجام نهدراون”.
