نرخی ئارد بەشێوەيەکی بەرچاو دابەزی

SNN-عەلی حەمە سەعید

بەڕێوەبەری چاودێری بازرگانی سلێمانی ئاماژە بەوەدەكات: بەهۆی ئەو ڕێككەوتنەی نێوان ڕوسیا و ئۆكرانیا بۆ ڕەوانەكردنی 50 ملیۆن تۆن گەنم بۆ بازاڕەكانی جیهان، ڕاستەوخۆ كاریگەری هەبووە لەسەر دابەزینی نرخی گەنم و ئارد لەبازاڕەكانی جیهان، هەر لەدوێنێوە تا ئەمڕۆ نرخی تۆنێك ئارد50 دۆلار دابەزینی بەخۆیەوە بینیوە و بەردەوامیش ڕوو لەدابەزین دەكات، هاوكات نرخی كاڵاو شمەكەكانی دیكەش دابەزینی بەرچاویان بەخۆیانەوە بینیوە.

سۆران عەبدولغەفور، بەڕێوەبەری چاودێری بازرگانی سلێمانی بە SNNی ڕاگەیاند: لەماوەكانی ڕابردوودا بەهۆی دەستپێكردنی شەڕی نێوان ڕوسیاو ئۆكرانیا و هەروەها بەرزبوونەوەی نرخی سوتەمەنی لە بازاڕەكانی جیهان بووەهۆی بەرز بوونەوەی نرخی سەرجەم كاڵاو خۆراكەكان، بەتایبەت نرخی گەنم و ئارد زۆر بەرزبوویەوە و ئەو بەرزبوونەوەیە هەرێمی كوردستانیشی گرتەوە، بەڵام لە ئێستادا بەهۆی ئەو ڕێككەوتنەی نێوان ڕوسیا و ئۆكرانیا بۆ ڕەوانەكردنی 50 ملیۆن تۆن گەنم بۆ بازاڕەكانی جیهان، ڕاستەوخۆ كاریگەری هەبووە لەسەر دابەزینی نرخی گەنم و ئارد لەبازاڕەكانی جیهان.

ئاماژەی بەوەشكرد: لە دوێنێوە تا ئەمڕۆ نرخی تۆنێك ئارد 50 دۆلار دابەزینی بەخۆیەوە بینیوە و بەردەوام نرخەكانیش ڕوو لەدابەزنیی زیاتر دەكەن و لە ڕۆژانی داهاتووشدا زیاتر نرخەكان دادەبەزن، هاوكات لە هەرێمی كوردستانیش نرخی ئارد لە 51 هەزار دینارەوە بۆ 42 هەزار دینار دابەزیوە.

بەڕێوەبەری چاودێری بازرگانی سلێمانی ئەوەشی خستەڕوو: جگە لە دابەزینی نرخی گەنم و ئارد مادە خۆراكییەكانی دیكە لە ڕۆن و برنج و چاو نۆك و زەیت و چەندین پێداویستی دیكەی خۆراكی دابەزینی بەرچاویان بەخۆیانەوە بینیوە بەراورد بە سێ‌ مانگی رابردوو كە نرخێكی بەرزیان تۆماركرد.