مەرزێکی دیکەی سنووری لە نێوان هەرێمی کوردستان و ئێران دەکرێتەوە

عەلی حمەسەعید-SNN

بەمەبەستی زیاتر گرنگیدان بە بواری بازرگانی لە نێوان هەرێمی کوردستان و وڵاتی ئێران، لە سەردانێکی پارێزگاری سنەی ڕۆژهەڵاتی کوردستان بۆ پارێزگای هەڵەبجە بڕیار لەسەرکردنەوەی مەرزی مڵەخورد درا لەنێوان پارێزگای هەڵەبجەو پارێزگای سنە.

ئازاد تۆفیق، پارێزگاری هەڵەبجە بە SNNی ڕاگەیاد: شاندێکی ئێرانی کە پێکهاتبوون لە ئیسماعیل زراعی پارێزگاری سنەو چەند بەرپرسێکی دیکە سەردانی پارێزگای هەڵەبجەیانکرد، ئەوەش بەمەبەستی گفتوگۆکردن لەسەر کردنەوەی خاڵە سنوورییەکانی نێوانمان، هاوکات ئامانجی سەردانەکەیان لەچوار چێوەی ئەو کۆبوونەوە و هەماهەنگیانەیە، کە لەڕابردوودا لەگەڵ پارێزگای سنە هەمانبووە.

ئاماژەی بەوەشکرد، لەکۆبوونەوەکەی ئەمڕۆداو پرسی کردنەوەی مەرزی مڵەخورد گفتووگۆی لەسەر کراوە و هەنگاوەکانی کردنەوەی مەرزی سازانیش گفتوگۆی لەسەر کراوە و دراوە بەتەندەرین.

لای خۆشیەوە ئیسماعیل زراعی پارێزگاری سنە لە کۆنگرەیەکی ڕۆژنامەوانیدا ئەوەی خستەڕوو،دوای ئەوەی تیمی هونەری هەردولامان سەردانی مەرزی مڵەخوردیان کرد، ئێمە پێشبینی دەکەین تا مانگی ئایندە مەرزەکە ئامادەبێت و هەموو جوڵەیەکی بازرگانی و ئابوری پێشێوازی لێدەکەین.