منداڵێکی تەمەن یەک ساڵ ئۆتۆمبێل لێیدا و گیانی لەدەستدا

عەلی حەمەسەعید_SNN

 وتەبێژی پۆلیسی پارێزگای هەڵەبجە ئاماژە بەوەدەکات ئێوارەی ئەمڕۆ لە ئەنجامی شێلانی منداڵێکی تەمەن یەک ساڵ لەلایەن شۆفێری ئۆتۆبێلێکەوە پاش برینداربوونی بەسەختی مداڵەکە گیان لەدەستدەدات، پۆلیس پەڕاوی لێکۆڵینەوەی بۆ ڕووداوەکە کردووەتەوە.

موقەدەم بەرزان عوسمان، وتەبێژی پۆلیسی پارێزگای هەڵەبجە بە SNNی ڕاگەیاند: سەرلەئیوارەی  ئەمڕۆ  لەگەڕەکی مۆردانەی پارێزگای هەڵەبجە منداڵێکی کوڕی  تەمەن  یەک ساڵ بەناوی  محەمەد بڕیار ئازاد ئۆتۆمبیلێک  دەیشێلێت و برینداری دەکات.

ئاماژەی بەوەشکرد، پاش گەیاندنی بۆ نەخۆشخانەی فریاکەوتنی هەڵەبجە بەهۆی سەختی برینەکەی ئەو منداڵە گیانی لەدەستداوە.

وتەبێژەکەی پۆلیسی پارێزگای هەڵەبجە ئەوەشی خستەڕوو، دۆسیەی لێکۆڵینەوە بۆ ڕووداوەکە  لەبنکەی پولیسی هەڵەبجە ڕێکخراوە و شوفێری ئوتومبیلە کە  بەپێ  مادەی  24هاتوچۆ  بەندکراوەو دەستیش بەسەرئوتومبیلەکەیدا گیراوە.