به‌رپرسێكى باڵاى پارتى و سه‌رجه‌م ستافه‌كه‌ى ده‌ستگیر كران
لۆگۆى پارتى دیموكراتى كوردستان | فۆتۆ: SNN
SNN
بەرپرسی ژمێریاری ئاسایشی گشتی ھەولێر و سه‌رجه‌م ستافه‌كه‌ى به‌تۆمه‌تى دیارنه‌مانى پاره ده‌ستگیران.
هێمن مامه‌ند، چالاكوان و رۆژنامه‌نووس له هه‌ژمارى تایبه‌تى خۆى له تۆڕى كۆمه‌ڵایه‌تى فه‌یسبووك نوسیویه‌تى، “لیوا شۆڕش عەباس بەرپرسی ژمێریاری ئاسایشی گشتی ھەولێر و سەرجەم ستافەکەی له بەشی ژمێریاری لەلایە ن پاراستنى پارتى دیموكراتى كوردستانه‌وه دەستگیرکراون”.
له نووسینه‌كه‌یدا ئه‌و رۆژنامه‌نووسه ئه‌وه‌شى خستووه‌ته‌ڕوو، “دوێنێ ھێزێکی پاراستن ھەڵیانکوتاوەتە سەر لیوا شۆڕش عەباس و ستافەکەی و سه‌رجه‌میان به‌یه‌كه‌وه ده‌ستگیر كردوون”.
له‌باره‌ى ئه‌و تۆمه‌ته‌ى دراوه‌ته پاڵ لیوا شۆڕش و ستافەکەی ئه‌و رۆژنامه‌نووسه ئه‌وه‌شى خستووه‌ته‌ڕوو، “لیوا شۆڕش و ستافەکەی بە تۆمەتی دزیکردن و ڕه‌شوە و بە رتیل وه‌رگرتن دەستگیر کراون و ھەروەھا دەیان تاوانی تریشیان ئەنجام داوە”.
ده‌ستگیركردنى ئه‌و به‌رپرسه‌ى پارتى دیموكراتى كوردستان له‌كاتێكدایه دوو رۆژ ماوه بۆ كۆنگره‌ى پارتى دیموكراتى كوردستان كه بڕیاره 3ى تشرینى دووه‌م، له دهۆك به‌ڕێوه‌بچێت، له ئێستاشدا دۆخى ناوخۆیی ئه‌و حزبه ناجێگیرى پێوه‌دیاره.
