لیژنەی دارایی گفتوگۆ لەسەر پلە بەرزکردنەوەی فەرمانبەران دەکات
کۆبوونەوەی لیژنەی دارایی پەرلەمانی کوردستان
لیژنه‌ی دارایی و كاروبارى ئابوورى تاوتوێی بڕیاری ئەنجومەنی وەزیران سەبارەت بە پلە بەرزکردنەوەی فەرمانبەران ده‌كات
پەرلەمانی کوردستان بڵاویکردووەتەوە، بەمەبەستی گفتوگۆکردنى بڕیاری ئەنجوومەنی وەزیران سەبارەت بە پلەبەرزکردنەوەی فەرمانبەران، ئه‌مڕۆ دووشەممه 5ـی کانوونی یەکەمی 2022، لیژنه‌ی دارایی و كاروبارى ئابووری پەرلەمانی کوردستان کۆبووەوە.
بەگوێرەی راگەیەندراوەکەی پەرلەمانی کوردستان، پلەبەرزکردنەوەی فەرمانبەران و راژەی خزمەتی فەرمانبەران، بابەتی سەرەکیی کۆبوونەوەکە بوون کە لەسەر داوای سەرۆکایەتیی پەرلەمانی کوردستان، ئاماژە بە بڕیاری ئەنجوومەنی وەزیران ژمارە (178) و کۆبوونەوەی ئەنجوومەنی وەزیران ژمارە (95)ی رۆژی 26/10/2022، دوای راو سەرنجگۆڕینەوەی ئەندامان لەو بارەیه‌وە، لیژنە بە راپۆرتێکی ورد و تێروتەسەل وەڵامیان دایەوە.
لە راگەیەندراوەکەدا هاتووە کە ئەو نووسراو و سكاڵایانەی ئاراستەی لیژنەكە کرابوون، خوێندنەوەیان بۆ كراوە و دوای گفتوگۆ و راگۆڕینەوه‌ی ئەندامان، ئەوانەی پێویستییان بە وەڵامدانەوە هەبوو، وەڵام درانەوە، ئەوانەی دیکەش ئاراستەی لایەنی پەیوەندیداركران بۆ كاری پێویست.
