کەشناسی هەرێم: سبەينێ بەفر دەبارێت

SNN
بەڕێوبەرايەتی گشتی کەشناسی و بومەلەرزەزانی هەرێم رايگەياند: ئەمڕۆ بارانبارين بەسێوەی بچڕ بچڕ بەردەوام دەبێت، سبەينێ پلەکانی گەرما دادەبەزێت و بەفر لە زۆربەی ناوچە شاخاوييەکان دەبارێت.

بەشی پێشبينييەکانی بەرێوەبەرايەتی کەشناسی و بومەلەرزەزانی هەرێم بڵاويکردەوە: ئەمڕۆ هەينی ئاسمان لە نێوان نیمچە هەور و هەوری تەواو دەبێت، ئەگەری نمە باران بەشێوەی پچڕ پچڕ لە هەندێک کات و ناوچەی جیاواز دەبێت بە تایبەت لە ناوچە شاخاوییەکانی سنووری پارێزگای هەولێر و سلێمانی و هەڵەبجە، پلەکانی گەرما نزم دەبێتەوە.

راشيگەياند: سبەی شەممە لە ئەنجامی هاتنی بارستە هەوایەکی سارد بۆ سەر ناوچەکەمان بە شێوەیەکی گشتی ئاسمان هەوری تەواو دەبێت و پلەکانی گەرما ڕوو لە نزم بونەوە دەکەن، باران بارین لە زۆربەی ناوچە جیاجیاکان دەبێت زۆرترین ڕێژەی دابارین لە سنووری ئیدارەی ڕاپەرین و ئیدارەی سۆران دەبێت.

ئاماژەی بەوەشکردووە: رۆژی شەممە پلەکانی گەرما نزم دەبێتەوە بە نزیکەی 1 تا 3 پلە بەراورد بە تۆمارکراوەکانی ڕۆژی پێشوو، هەورەها بەفر لە زۆربەی ناوچە شاخاوییەکان دەبارێت.