جەبار گۆران: دۆلارەکەی بانکی ناوەندی پشکی کۆمپانياکانی هەرێمی تێدا نييە

SNN-عەلی حەمە سەعید

وتەبێژی بازاڕی دراوەكانی شاری سلێمانی باس لەوەدەکات: جگە لە زۆری خواست لەسەر دۆلار نەبوونی پشكی كۆمپانیاكانی هەرێم لەو دۆلارەی لەلایەن بانكی ناوەندییەوە دەخرێتە بازاڕ هۆكارە بۆبە بەرزی مانەوەی نرخی دۆلار.

جەبار گۆران، وتەبێژی بازاڕی دراوەكانی سلێمانی بە SNNی ڕاگەیاند: ئەو برە دۆلارەی كە ڕۆژانە لەلایەن بانكی ناوەندی عێراقییەوە دەخریتە بازاڕ بەشێوەی كاش و حەواڵە، هیچ پشكێكی كۆمپانیاكانی هەرێمی تێدا نییە هەر ئەمەش وایكردووە كە خواست لەسەر دۆلار زیاتر ببێت و بەردەوام نرخی دۆلاریش بەرەو بەرزبوونەوەی زیاتر بڕوات، هاوكات هێشتا بانكەكان خۆیان لەگەڵ ئەو سیستەمە نوێیە نەگونجاندووە كە بۆحەواڵە دیاریكراوە ئەوەش هۆكارێكی دیكەیە كە خواست لەسەر دۆلارزۆر ببێت  بۆ هاوردەكردنی كاڵاو شمەك.

ئاماژەی بەوەشكرد، بەشێك لە بانكە بازرگانییەكان كاتێك داوا لە بانكی ناوەندی دەكەن ئەو بڕە پارەیەی بۆ هاوردەكردنی كاڵا پێویستە رەوانەی دەرەوەی بكات، پەسەند ناكرێت و رەتكدەكرێتەوە، ئەمەش وایكردووە بازرگانەكان جارێكی دیكە پەنا بۆ بازاڕی ئازاد ببەنەوە لەگەڵ ئەوەشدا بەشێك لە بازرگانەكان مۆڵەتی هاوردەكردنی كاڵایان نییە لەلایەن حكومەتەوە، بۆیە ئەوانیش ناچار دەبن پەنا بۆ بازاڕی ئازاد ببەن و بەمەش خواست لەسەر دۆلار زیاتر دەبێت و بەهاكەی بە بەرزی دەهێڵێتەوە.

وتەبێژەكەی بازاڕی دراوەكانی سلێمانی ئەوەشی خستەڕوو، تا نزیكی كۆتایی ساڵی ڕابردوو بانكی ناوەندی ڕۆژانە نزیكی 250 ملیۆن دۆلاری دەخستە بازاڕەوە، ئەوەش خواستی بازاڕەكانی پڕدەكردەوە لە پێداویستی دۆلار، بەڵام لە كۆتایی ساڵی ڕابردوو سەرەتای ئەمساڵ تا ئێستا بڕی خستنەڕووی دۆلار لەلایەن بانكی ناوەندییەوە زۆر كەمیكردووە بەجۆریك نزیكەی لە %50ی ئەو دۆلارەی ئێستا دەخرێتە ڕوو كەمترە لەو بڕەی پێشتر دەخرایە بازاڕەوە ئەمەش وایكردووە ئەو دۆلارەی دەخریتە بازاڕەوە بەشی پێداویستی بازرگانەكان نەكات.