لە مەودوا هەر کەسێک پارەی لە بانکدا هەبێت دەبێت بە دینار وەریبگرێت
دۆلار
SNN
بانكى ناوه‌ندى عێراق بڕیارێكى نوێى ده‌ركرد بۆ ئه‌و كه‌سانه‌ى كه له‌ڕێگه‌ى ئامێره‌كانى راكێشانى پاره (ATM) له‌به‌رده‌م بانكه‌كاندا پاره راده‌كێشن و رایگه‌یاند، “ته‌نیا ده‌توانن دینار رابكێشن”.
ئه‌مڕۆ یه‌كشه‌ممه 12ى ئازار، بانكى ناوه‌ندى عێراق له‌باره‌ى ناوه‌ڕۆكى بڕیاره‌كه‌یه‌وه ئاماژه‌ى به‌وه‌كرد، “بڕیارماندا راكێشانى پاره له ئامێره‌كانى ئه‌ى تى ئێم بكرێت به دینار، واته لێره‌وه به‌دواوه هه‌موو كه‌س ده‌توانێت ته‌نیا دینار رابكێشێت، به‌پێچه‌وانه‌وه ناتوانێت دۆلار رابكێشێت و ئه‌گه‌ر ویستى دۆلار رابكێشێت ناچاره سه‌ردانى لقى سه‌ره‌كى بانكه‌كه بكات”.
بانكى ناوه‌ندى له به‌یاننامه‌كه‌یدا هۆكارى بڕیاره‌كه‌ى گێڕاوه‌ته‌وه بۆ، “زیادكردنى متمانه به دینارى عێراقى له‌لایه‌ن هاووڵاتیانه‌وه”.
له‌باره‌ى ئه‌و نرخه‌ى كه دیارى كراوه بۆ ئه‌و دۆلاره‌ى كه راده‌كێشرێت، بانكى ناوه‌ندى عێراق ئه‌وه‌ى خستووه‌ته‌ڕوو، “100 دۆلار به 148 هەزار دینار دیاریكراوه، واته ئه‌و كه‌سانه‌ى كه دۆلار له هه‌ژماره‌كه‌یاندا هه‌یه و له ئامێره‌كانى راكێشانى پاره‌وه رایده‌كێشن هه‌ر 100 دۆلارێكیان به 148 هه‌زار دینار بۆ هه‌ژمار كراوه”.
