“سیاسەتی قۆڵبادان و ململانێی ناتەندروستی حیزبی داهاتووی هەرێمی خستووەتە مەترسییەوە”
كۆبوونهوهى قوباد تاڵەبانی، جێگرى سهرۆكى حكومهتى ههرێم و جێسیکا سڤاردسترۆم، باڵیۆزی سوید لە عێراق | فۆتۆ: Azhe Omar
SNN
قوباد تاڵەبانی جێگری سەرۆکى حكومەتى هەرێم لە هەولێر پێشوازیکرد لە جێسیکا سڤاردسترۆم، باڵیۆزی سوید لە عێراق و لە کۆبوونەوەی نێوانیاندا بارودۆخی ناوخۆی هەرێم و پەیوەندییەکانی نێوان هەرێم و بەغدا تاوتوێکران.
لە کۆبوونەوەکەدا کە رۆژی دووشەمە 5ی حوزەیران، بەڕێوەچوو، سەبارەت بە کێشە و ناکۆکییە ناوخۆییەکانی کوردستان هەردوولا هاوڕابوون کە دەبێت لایەنە سیاسییەکان ئەزمون لە ناکۆکییەکانی رابردوو وەربگرن و پەلە بکەن لە چارەسەرکردنی کێشەکان.
لەم چوارچێوەیەدا قوباد تاڵەبانی رایگەیاند، “لە کاتێکدا کە هەرێمی کوردستان لە دۆخێکی سیاسی و ئابوری باشدا نییە، پێویستە لەپێناو پاراستنی بەرژەوەندی هاوڵاتییان هەموو لایەکمان بەرپرسیارانە هەنگاوبنێین بۆ چارەسەرکردنی کێشە و ناکۆکییەکان”.
جێگری سەرۆکى حكومەتى هەرێم ئاماژەی بەوەشکرد، “زۆربەی کێشەکان کێشەی حیزبی و شەخسین. وتیشی: “ئەم جۆرە لە ململانێ و قۆڵبادانی حیزبی و شەخسی ناوماڵی کورد زیاتر پەرت دەکات و داهاتووی هەرێمی کوردستانی خستووەتە مەترسییەوە”.
سەبارەت بە پرسی هەڵبژاردنەکانی داهاتووی پەرلەمانی کوردستانیش، قوباد تاڵەبانی رایگەیاند، “ئێمە هەمیشە لەگەڵ ئەوەدابووین هەڵبژاردن لە کاتی خۆیدا بەرێوەبچێت، تەنها پێداگربووین لەسەر ئەوەی هەڵبژاردنێکی پاک و بێگەرد و ئازاد و دادپەروەرانە بێت”.
داواشیکرد لایەنە سیاسییەکان گفتوگۆکانیان دەستپێبکەنەوە بۆ ئەوەی کارئاسانی بکرێت تا لە ماوەیەکی نزیکدا و بە باشترین شێوە هەڵبژاردنەکان بەڕێوەبچێت.
سەبارەت بە پەیوەندییەکانی نێوان هەرێم و بەغداش جێگری سەرۆکى حكومەتى هەرێم رایگەیاند، “ئەگەر کێشە ناوخۆییەکانی کوردستان چارەسەر بکرێت کاریگەری دەبێت لەسەر بەهێزتر بوونی پێگەی هەرێم لە بەغدا”.
