سلێمانی.. دەیان ماڵ 1.5 مێگاوات کارەبا بەرهەم دەهێنن

SNN

لە رێگەی سیستمی سۆلارەوە دەیان ماڵ لە سلێمانی 1.5 مێگاوات کارەبا بەرهەم دەهێنن و بەهۆی تێکەڵکردنی بەرهەمەکەیان لەگەڵ تۆڕی کارەبای نیشتمانی، لە کرێی کارەباکەیان کەم دەکرێتەوە.

سیستمی سۆلار یان بەرهەمهێنانی کارەبا لە وزەی خۆر یەکێکە لە جۆرەکانی بەرهەمهێنانی کارەبا کە ژینگە دۆستە و لە وڵاتانی جیهان تا دێت زیاتر گرنگی بەو بوارە دەدرێت.

بە گوێرەی ئامارەکانی وەزارەتی کارەبای حکومەتی هەرێم 150 ماڵ لە سلێمانی سیستمی کارەبای سۆلاریان لەسەر بانەکانیان دامەزراندووە. ئەمە جیالەوەی هەندێک هاووڵاتی دیکەش ئەو سیستمەیان دامەزراندووە، بەڵام بە فەرمی تۆماریان نەکردووە.

ئاماژەی بەوەشکردووە، ئەو ماڵانە توانای بەرهەمهێنانی 1.5 مێگاوات کارەبایان هەیە و بە پێی رێنمایی وەزارەتی کارەبا، کارەبای سیستەمی سۆلاری ماڵان دەتوانرێ تێکەڵ بە کارەبای نیشتمانی بکرێت و بە هەمان رێژەی وەرگیراو، لە کرێی کارەباکەیان کەم دەکرێتەوە.