فێستیڤاڵی هەناری هەڵەبجە؛ بەکارهێنانی پلاستیک قەدەغە دەکرێت و مەرجی توند دانرا

SNN-

 لیژنەی باڵای فێستیڤاڵی هەناری هەڵەبجە لە پێناو پاراستنی تەندروستیی هاونیشتمانییان، ژینگەی شارەکە و سروشتی ناوچەکە، سەرجەم بەشداربووان و خاوەن کۆشکەکانی پابەند کرد کە تەنها پێداویستیی دۆستی ژینگە بۆ پێشکەشکردنی خواردن و بەرهەمەکانیان بەکاربهێنن و بەکارهێنانی هەر بابەتێکی پلاستیکی بە هەموو جۆرێک قەدەغە کرد.

 لیژنەکە کۆمەڵێک ڕێنمایی بڵاوکردەوە کە لەوانە ئیمزاکردنی بەڵێننامەی یاسایی لەلایەن بەشداربووانەوە پاش دەرچوونی ناوەکانیان بۆ پابەندبوون بە بڕیارەکەوە.

 جەخت کرایەوە کە لە کاتی بەسەرکردنەوەی لیژنەکاندا هەر بەشداربوویەک پابەند نەبێت، دەستبەجێ مافی بەشداریکردنی لە فێستیڤاڵەکەدا لێ دەسەندرێتەوە و دووردەخرێتەوە.

بەشداربووان ئازاد کراون لە هەڵبژاردنی هەر کۆمپانیا و لایەنێک بۆ دابینکردنی پێداویستییە ژینگەدۆستەکان بە کەمترین نرخ، و داوا لە هەموو لایەک کراوە بەدەم ئەم هەنگاوەوە بێن بۆ بەرزڕاگرتنی ئاستی شارستانیی فێستیڤاڵەکە.