ئەرمینیا: دوو سەربازمان بە تەقەی هێزەکانی ئازەربایجان کوژراون

SNN

گرژی لە سەر سنووری ئەرمینیا و ئازەربایجان هاتە ئاراوە و بەهۆیەوە دوو سەربازی ئەرمەنی کوژران و سەربازێکی دیکەش برینداربوو.

لەو بارەوە وەزارەتی بەرگریی ئەرمینیا رایگەیاند، کە لە نزیک شاری سۆتک سوپای ئازەربایخان تەقەیان لە بنکەیەکی سەربازی هێزەکانی سەر بە حکومەتی یەریڤان کردووە و بە هۆیەوە دوو سەرباز کوژراون و سەربازێکیش برینداربووە.

ئەو ناوچەیە دەکەوێتە باشووری رۆژهەڵاتی ئەرمینیاوە و چەندین جار لەو شوێنە شەڕ لەنێوان سوپای ئەو وڵاتە و سوپای ئازەربایجاندا روویداوە.

پێشتریش لە 28ی حوزەیراندا چوار سەربازی ئەرمینیا لەو ناوچەیە کوژرابوون.

نیکۆل پاشینیان سەرۆکوەزیرانی ئەرمینیا لەناوەڕاستی مانگی تەمووزدا بە ئاژانسی فرانس پرێسی راگەیاندبوو، کە ئەگەری هەیە شەڕێکی نوێ لە نێوان وڵاتەکەی و ئازەربایجاندا هەڵبگیرسێتەوە.

لە نێوان 27ی ئەیلول و 10ی تشرینی دووەمی 2020 شەڕێکی قورس لە نێوان هەردوو وڵات لەسەر ناوچەی قەرەباغ هاتە ئاراوە، کە تیایدا ئازەربایجان بە پشتیوانی تورکیا توانی دەست بە سەر زۆربەی ناوچە جێناکۆکەکانی نێوانیان بگرێت.