پەرلەمانتارێک: بەغدا پارە بۆ مووچە دەنێرێت بەڵام هەرێم لە بواری تردا خەرجی دەکەن

SNN

ئەندامێکی لیژنەی نەوت و غاز لە پەرلەمانی عێراق رایگەیاندووە، بەغدا پارە بۆ مووچە خۆرانی هەرێم دەنێرێت بەڵام بەرپرسانی هەرێم لە بواری تردا خەرجی دەکەن، دەڵێت “پەرلەمانتارەکانی هەرێم دەڵێن هەرێم جگە لە مووچە پابەندبوونی تری لەسەرە و پارەکە بەش ناکات”.

ئەمڕۆ پێنج شەممە ١٤ی ئەیلوول، عەلی مەشکور، ئەندامی لیژنەی نەوت و گاز و سامانە سروشتییەکانی پەرلەمانی عێراق رایگەیاندووە، پشکی هەرێم لە بودجەی عێراق لەسەر ئەو بنەمایە رەوانە دەکرێت، کە بدرێت بە مووچەی فەرمانبەران، وتوویەتی “ئەوەی جێگەی سەرسوڕمانە هەندێک لە پەرلەمانتارە کوردەکان باسی ئەوە دەکەن، ئەو پارەیەی بەغدا دەینێرێت تەنها لە مووچەدا خەرجی ناکەن، بەڵکو بۆ پابەندییەکانی تری هەرێم خەرجی دەکەن”.

ئاماژەی بەوەکردووە، “بەغدا ئەو پارەیە بۆ مووچە دەنێرێت بۆ هەرێمی کوردستان و پێویستە لە مووچەدا خەرج بکرێت، نەک پابەندییەکانی تر،هەر بۆیە پێویستە گەلی کورد بزانێت و تەنها لە ناو گفتوگۆکانی ناو ئەنجوومەنی نوێنەران و هێزە سیاسییەکاندا نەمێنێتەوە”.