نوێترین زانیاری لەبارەی باران بارین لەڕۆژانی داهاتوودا

SNN-عەلی حەمە سەعید

بەڕێوەبەری كەشناسی و بومەلەرزەزانی سلێمانی ئاماژە بەوەدەكات لەشەوی ڕابردووەوە كەشێكی باراناوی سنوری پارێزگای سلێمانی و دەوروبەری گرتووەتەوە و ئەم كەشەش بۆ ماوەی چەند رۆژێكی دیكە بەردەوام دەبیت و بەوهۆیشەوە كەشوهەوا ناسەقامگیر دەبێت و پلەكانی گەرماش زیاتر نزمدەبنەوە، هاوكات ئەمساڵ بڕی باران لە ساڵی ڕابردوو زیاتر دەبێت.

ئاسۆ كەمال بەڕێوەبەری كەشناسی و بومەلەرزەزانی سلێمانی بەSNNی راگەیاند: بەگوێرەی پێشبینییە كەشناسییەكان دۆخی باران بارین لە مساڵدا بەراورد بە ساڵی ڕابردوو باشتر و زیاتر دەبێت، بەجۆرێك ئەمساڵ چەندین شەپۆلێكی بارانبارینی زۆرباش ناوچەكانی هەرێم دەگرێتەوە و سەرجەم ناوچەكانی هەرێم باران تیایاندا تۆمار دەكرێت بەڕێژەی زۆرباش.

ئاماژەی بەوەشكرد، لە شەوی ڕابردووەوە كەشێكی باراناوی سنوری پارێزگاكانی هەرێمی كوردستانی گرتووەتەوە و زۆرترین ڕێژەی بارانبارین لە پارێزگای دهۆك باریوە، هاوكات كاریگەری ئەم كەشوهەوایە تا ڕادەیەك ناسەقامگیر بۆ ماوەی چەند ڕۆژێك لەسەر ناوچەكان دەمێنێتەوە و پلەكانی گەرماش زیاتر نزمدەبنەوە و لە پارێزگاكانی دیكەش باران بارین بە شێوەیەكی هەڕەمەكی باریوە.

بەڕێوەبەری كەشناسی و بومەلەرزەزانی سلێمانی ئەوەشی خستەڕوو، لەماوەی كەمتر لە 24كاتژمێری ڕابردوودا لە پارێزگای سلێمانی نیو ملیم باران باریوە بەڵام بەشێوەیەكی گشتی وپێشبینی دەكرێت ئەمساڵ ئاستی باران بارین زۆرتربێت لە ساڵانی ڕابردوو.