هاوردەكردنی ئۆتۆمبێلی مۆدێل 2022 قەدەغەدەكرێت

SNN-عەلی حەمە سەعید

بەڕێوەبەری گشتیی بازرگانی لە وەزارەتی بازرگانی و پیشەسازی حكومەتی هەرێم ئاماژە بەوەدەكات لەمانگی داهاتووەوە هاوردەكردنی ئۆتۆمبێلی مۆدێل 2022 قەدەغەدەكرێت و دەبێت ئۆتۆمبێلی مۆدێل 2023 و 2024 هاوردەبكرێن، هاوكات ئەمساڵیش 80 هەزار ئۆتۆمبێل هاوردەكراوە.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: هاوشێوەی ساڵانی ڕابردوو هاوردەكردنی ئۆتۆمبێلی مۆدێل 2023 بەردەوامی هەبووە و بەگوێرەی ڕێنماییەكان لەمانگی داهاتووەوە هاوردە كردنی ئۆتۆمبێلی مۆدێلی 2022 قەدەغەدەكرێن و پێویستە لەمانگی داهاتووەوە ئۆتۆمبێلی مۆدێل 2023 و مۆدێل 2024 هاوردەبكرێن.

ئاماژەی بەوەشكرد، لەمساڵدا لەدەروازە سنورییەكانی هەرێمی كوردستان بەگوێرەی مەرج و ڕێنماییەكان 520مامەڵەی هاوردەكردنی ئۆتۆمبێل ئەنجامدراون، لەكۆی ئەو مامەڵانەش تواندراوە زیاد لە 80 هەزار ئۆتۆمبێلی گەورو و بچوك هاوردەبكرێن.

وتەكانی ئەو بەرپرسەی وەزارەتی بازرگانی و پیشەسازی حكومەتی هەرێم لەكاتێكدایە كە ساڵی ڕابردوو زیاد لە 100 هەزار ئۆتۆمبێلی گەورەو بچوك هاوردەی هەرێمی كوردستان كراون، هاوكات بەهۆی زۆری ژمارەی ئۆتۆمبێل لە شار و شارۆچكەكان ڕووداوەكانی هاتووچۆش ساڵانە ڕوو لە زیاد بوون دەكەن.