“رای حکومەتی عێراق گۆڕاوە و هاوسۆزن بۆ ناردنی مووچەی فەرمانبەرانی هەرێم”
هونەر جەمال، وتەبێژی وەزارەتی دارایی
SNN
هونەر جەمال، وتەبێژی وەزارەتی دارایی هەرێم بە “دەنگی ئەمەریکا”ی راگەیاندووە:” لە دوایی سەردانی وەزیری دارایی بۆ بەغدا حکومەتی عێراق بەتەواوەتی بۆچونیان گۆڕا، کە ئێمە هیچ شتێکمان نییە شاراوە بێت و هیچ داتایەکمان نییە لەلایەن ئەوانەوە ڕەت بکرێتەوە “.
وتیشی:” ئەوان تەواو هاوڕابوون لەگەڵ زانیاریەکانی ئێمە؛ هاوسۆزی و پشتیوانیەک دروست بوو کە چیتر مووچەی فەرمانبەرانی هەرێم نەبەسترێتەوە بە هیچ کێشە و ململانێ و پابەندییەکەوە و لە کاتی دابەشکردنی مووچەی عێراقدا مووچەی فەرمانبەرانی هەرێمیش بنێرێت “.
وتەبێژی وەزارەتی دارایی باسی لەوەشکرد:” هەندێک داتاو زانیاری هەبوو هەم وەزیری دارایی عێراق هەم لیژنەی دارایی لەسەر ئێمە حسابیان کردبوو، ئێمە چووین ڕاستی بکەینەوە و ڕاپۆرتێکی ورد و پڕ زانیاریمان لەسەر کۆی خەرجی و داهاتی شەش مانگی ڕابردوو لەسەر ژمارەی فەرمانبەر و خانەنشین و چاودێری کۆمەڵایەتی ئامادەبوو، بە بەڵگە و داتا و زانیاری خستمانەڕوو “.
ئەوەشی خستەڕوو:” ڕاپۆرتەکەمان دەرفەتی بۆ لێکدانەوە و هیچ تەموومژێک نەهێشتەوە لەسەر خەرجی و داهات، ئەوان خۆیان دانیان بەوەدا نا کە پێشتر زانیاری هەڵە هەبووە، زۆر مورتاح بوون بە چوونی ئێمە، چونکە هیچ شتێک نەمایەوە لای ئەوان کە جێگەی پرسیار یان تەموومژ بێت “.
