رێبوار تەها: ئەم ھەڵبژاردنە چارەنووسسازە بۆ مانەوەی نەتەوەکەمان

SNN-

سەرۆکی لیستی هاوپەیمانیی کەرکوک هێز و ئیرادەمانە رایگەیاند، کەرکوک شایانی ئیدارەیەکی باشتر و رەسەنترە و ئەم ھەڵبژاردنە، ھەڵبژاردنێکی چارەنووسسازە بۆ مانەوەی نەتەوەکەمان.

رێبوار تەها، سەرۆکی لیستی هاوپەیمانیی کەرکوک هێز و ئیرادەمانە لە پەیامێکدا رایگەیاند، لە پەرۆشیمان بۆ کۆتاییهێنان بە زوڵم و ستەمکاریی لە دژی گەلەکەمان، لەپێناو پاراستنی ناسنامەی کوردانەی کەرکوک، بە هەستکردن بە تەحەدداکانی بەردەم ئایندەی نەتەوەکەمان، هاوپەیمانی (کەرکوک هێز و ئیرادەمانە) بۆ هەڵبژاردنی ئەنجومەنیی پارێزگای کەرکوک رادەگەیەنین.

“لە دوای پرۆسەی ئازادی عێراق ئەمە دووەم جارە هەڵبژاردنی ئەنجومەنی پارێزگای کەرکوک ئەنجامدەدرێت، بۆیە ئەم هەڵبژاردنە، هەڵبژاردنێکی چارەنووسسازە بۆ مانەوەی نەتەوەکەمان، بۆ ئایندەی کچان و کوڕانی شارەکەمان بەتایبەت دوای ئەو دۆخە سیاسیی و ئیداریی و عەسکەرییە نەخوازراوەی بەسەر شارە خۆشەویستەکەماندا سەپێنراوە” رێبوار تەها وادەڵێت.

دەشڵێت:” کەرکوک و نەتەوەکەمان لە بەردەم هەڕەشەی گەورە و هەلومەرجێکی تەواو جیاواز و ساتەوەختێکی هەستیار و یەکلاکەرەوەدایە، بۆیه بانگەوازی نیشتمانیمان رووی لێتانە بۆ ئەوەی بە گیانێکی پەرۆش و بەرپرسیارانەوە لە خەمی سەرخستنی لیستەکەماندابین تا ببینە هێزێکی دیموکراتی وکۆتایی بە دۆخی سەپێنراوی کەرکوک بێنێ و دۆخەکە بخاتە خزمەتی کەرکوک و پێکەوەیی هەموو کەرکوکییەکاندا، بۆیە با هەمووان لە رۆژانی بانگەشەدا کەشێکی ئارام و دۆستانە و شارستانیانە بخوڵقێنین، دوور لە دروستکردنی کێشە و ئاستەنگ بۆ هاوڵاتییانی شارەکەمان”.