دابەشكردنی نەوت نرخی نەوتی لە 185هەزاردینارەوە بۆ 165هەزار دینار دابەزاندووە

SNN-عەلی حەمەسەعید

لەگەڵ ئەوەی لەچەند مانگی ڕابردوودا نرخی بەرمیلێك نەوتی سپی ماڵان زیاتر لە 185 هەزاردیناری تێپەڕاند، بەڵام لەگەڵ دەستكردن بە پڕۆسەی دابەشكردنی نەوت نرخی نەوت دابەزینی بەخۆیەوە بینیوە و لە ئێستادا نرخی بەرمیلێك نەوت لە نێوان 165 بۆ 170 هەزار دیناردایە، بەوتەی نەوتفرۆشانیش ئەگەر ئەم دابەشكردنە بەدەوام بێت نرخی نەوت زیاتر دادەبەزێت.

ئاری بەكر، یەكێك لەنەوتفرۆشەكانی سنوری پارێزگای سلێمانی و هەڵەبجە بەSNNی ڕاگەیاند: دوای ئەوەی وەزارەتی سامانە سروشتییەكانی هەرێم دەستیكرد بە پرۆسەی دابەشكردنی نەوتی سپی ماڵان ئەمە كاریگەری زۆر باشی هەبوو لەوەی ڕێگربوو لە زیاتر بەرزبوونەوەی نرخی نەوت بەڵكوو بە پێچەوانەوە نرخەكەشی دابەزاند.

ئاماژەی بەوەشكرد، پێشدەستكردن بە پرۆسەی دابەشكردنی نەوت نرخی بەرمیلێك نەوت 185 هەزاری تێپەڕاندو پێشبینی دەكرا نرخەكەی بۆ نزیكەی 200 هەزار بەرز ببێتەوە، بەڵام بەدابەشكردنی نەوت لە ئێستادا نرخی بەرمیلێك نەوت لەنێوان 165 بۆ 170 هەزار دیناردایە و ئەگەریش دابەشكردنی نەوت هەروا بەردەوامبێت ئەوا نرخەكەی زیاتر دادەبەزێت.

پێشتریش لێپرسراوی بەشی پشكنین لە بەڕێوەبەرایەتی نەوت و كانزاكانی سلێمانی ئەوەی بە SNNڕاگەیاندبوو كە سنوری پارێزگای سلێمانی پێویستی بە زیاتر لە 110 ملیۆن لیتر نەوت هەیە بۆ ئەوەی هەرخێزانێك بڕی 200 لیتر نەوتی پێبدرێت، بەڵام لە ئێستادا رۆژانە پێنج بۆ 15 تانكەر نەوت دێت بۆ دابەشكردنی، لەكاتێكدا دەتوانن رۆژانە دوو ملیۆن لیتر نەوت دابەشبكەن.