دوای لابردنی وەک سەرۆکی پەرلەمان ئەگەری، زیندانی و قەدەغەی سەفەر لەسەر حەلبوسی هەیە

SNN

محەمەد ساعدی، پسپۆر و شارەزای کاروباری یاسایی بە میدیایەکی عێراقی رایگەیاند، ئەو تۆمەتانەی کە ئاراستەی محەمەد حەلبوسی سەرۆکی پێشووی ئەنجوومەنی نوێنەرانی عێراق کراوە تەنیا بە لابردنی وەک سەرۆک پەرلەمان نییە بەڵکو چەند رێکارێکی دیکەی یاسایشی بەرامبەری دەگیرێتە بەر.

ساعدی دەڵێت، ئەو دۆسێیانەی ئاراستەی حەلبوسی کراونەتەوە تەنیا پەیوەندی بە کۆتاییهێنان بە ئەندامێتی لە ئەنجومەنی نوێنەرانی عێراق نییە، بەڵکو ڕێوشوێنی یاسایی هەیە کە لەدژی دەگیرێتەبەر”.

وتیشی” کەسانێک هەن کۆمەڵێک دۆسێیان بەرامبەر حەلبوسی لە دادگا جوڵاندووە کە خۆی دەبینێتەوە لە ساختەکاری و دۆسییەی شەرەف، وە گەر بەراستیش ئەو تۆمەتانە بەسەر سەرۆکی پێشووی پەرلەمان یەکلای بێتەوە ئەوا چارەنوسی زیندانی دەبێت و ماوەی زیندانیەکەش لە 15 ساڵ کەمتر نەبێت، لەگەڵ ئەوەشدا ناتوانێت بۆ هیچ پرۆسەیەکی سیاسی و پەرلەمانی دیکە لە داهاتوودا خۆی کاندید بکاتەوە، هەروەها بەپێی پەیڕەوی ناوخۆی ئەحزاب لە عێراق دەبێت لە سەرۆکی حزبی تەقەدوم دەربکرێت، چونکە دۆسییەی شەرەفی لەسەرە، ئەمە جگە لە قەدەغەی گەشت و چوونی بۆ دەرەوەی وڵات تا دادگای بڕیاری کۆتایی لەسەر دۆسییەکانی دەدات”.

دادگای باڵای فیدراڵی عێراق، لە هەفتەی رابردوودا، ئەندامێتی محەمەد حەلبوسی لە سەرۆکی پەرلەمانی عێراق هەڵوەشاندەوە بە تۆمەتی ساختەکردنی دەستلەکارکێشانەوەی پەرلەمانتاری پێشووی عێراق لەیس دلەیمی.

رۆژنامەی (شەرقول ئەوسەت)ی لەندەنی لە ڕاپۆرتێکدا ئاشکرای کرد دواجار حزبی “تەقدوم” جۆتە ژێرباری بڕیاری دورخستنەوەی محەمەد حەلبوسی، ئەویش دوای گفتوگۆیەكی چڕو پڕ كە پێنج شەممە ئەنجامیاندا.

ڕۆژنامەکە هۆکاری ڕازی بوونی حەلبوسی بە بڕیارەکەی دادگای فیدڕاڵی بۆ ئەوە گەڕاندۆتەوە کە پێدەچێت ئەو پەیامانەی گەیشتووەتەوە ناوبراو لە لایەن و هێزە ئیقلیمیەكانەوە ئەوەی تێدابێت کە سەردەمی حەلبوسی بەتەواوی كۆتایی هاتوە، ڕووبەڕوبونەوەی یاسایی و سیاسی لەگەڵ لایەنە پەیوەندارەكان هیچ سودێكی نەبێت.