یەکشەممەی داهاتوو دادگای فیدڕاڵی عێراق لەسەر دادگایکردنی مەسرور بارزانی کۆدەبێتەوە

SNN

وا بڕیارە، دادگای فیدڕاڵی لەسەر سکاڵایەکی پەیوەست بە مووچەی فەرمانبەرانی ھەرێم کۆدەبێتەوە و سکاڵاکارەکان داوایان کردووە دادگاکە حکومەتی ھەرێم پابەندبکات بە جێبەجێکردنی یاسای مووچە کە لە سەرانسەری عێراقدا بەرکارە.

رۆژی یەکشەممەی داھاتوو، 26ی تشرینی دووەم، دادگای فیدڕاڵی یەکەمین دانیشتنی لەسەر سکاڵایەک ئەنجامدەدات کە دژی جێبەجێنەکردنی یاسای مووچەی فەرمانبەرانی دەوڵەت و کەرتی تایبەت، کە لەسەر مەسرور بارزانی، سەرۆکی حکومەت و ئاوات شێخ جەناب، وەزیری دارایی ھەرێم تۆمارکراوە.

سکاڵاکارەکان کە نۆ کەسن و فەرمانبەری حکومەتی ھەرێمن، داوایان لە دادگای فیدڕاڵی کردووە حکومەتی ھەرێمی کوردستان پابەند بکات یاسای مووچەی فەرمانبەرانی دەوڵەت وەک خۆی جێبەجێ بکات، بەتایبەت ماددەکانی (6 و 7 و8 و 9) و بڕیاری راگرتنی پلە بەرزکردنەوەی فەرمانبەرانیش ھەڵبوەشێنێتەوە.

10ی ئەیلولی ئەمساڵیش دادگای فیدڕاڵی داوایەکی بۆ بەنادەستووریی لە قەڵەمدانی راگرتنی پلە بەرزکردنەوەی فەرمانبەرانی ھەرێمی کوردستان رەتکردەوە و رایگەیاند، ئەو سکاڵایە لە تایبەتمەندی داداگەکەدا نییە.