باڵیۆزی ئەمریکا: هێزەکانمان لە عێراقدا دەمێننەوە
کشانەوەى هێزەکانى ئەمریکا لە عێراق | فۆتۆ: AP
SNN
باڵیۆزی ئەمریکا لە عێراق رایگەیاند، هەماهەنگی هاوبەش هەیە بۆ رێگریکردن لە هێرشەکان بۆسەر بنکە سەربازییەکانیان لە عێراق و لەو وڵاتەدا دەمێننەوە.
ئەمڕۆ پێنجشەممە، ئالینا رۆمانۆوسکی باڵیۆزی ئەمریکا لە عێراق لە هەژماری تایبەتی خۆی لە پلاتفۆرمی ئێکس رایگەیاند، لەگەڵ فوئاد حسێن وەزیری دەرەوەی عێراق سەبارەت بە پرسی پابەندبوونی عێراق بە پاراستنی دیبلۆماتکار و سیاسەتمەدار و هێزەکانی ئەمریکا کۆبووەوە.
وتیشی “هەماهەنگی هاوبەش بۆ رێگریکردنی هێرشی سەر هێزەکانمان هەیە و پابەندین بەمانەوەی هێزەکانمان لەعێراق.”
ئاشکرایکردووە، سەردانی ئەمجارەی بۆ دڵنیابوونەوە لەهەماهەنگی هاوبەش بۆ رێگریکردن لەهێرشی سەر هێزە ئەمریکییەکان لەعێراق و هەرێم بووە.
لەدوو هەفتەی رابردوودا، باڵیۆزی ئەمریکا لەعێراق رایگەیاند، سەردانی هەرێمی کوردستانی کردووە، بۆ ئەوەی پابەندبوونی ئەمریکا بەرامبەر بەناوچەکە دوپاتبکاتەوە.
