داوا دەکرێت ئاگربەست لە نێوان ئیسرائیل و حەماس درێژبکرێتەوە

SNN

دوای ئەوەی بۆ ماوەی چەند رۆژێک ئاگربەست لە نێوان ئیسرائیل و حەماس راگەیەنرا و چەندین بارمتەی هەردوو لا ئازاد کران، بۆ جاری سێیەم داوا دەکرێت ئاگربەست بکرێتەوە، چونکە هێشتا بارمتەی ژن و منداڵ لەلای حەماس ماون.

بەگوێرەی سەرچاوەیەکی تایبەت بە ماڵپەڕی سی ئێن ئێنی ئنگلیزی، بەڕێوەبەری CIA بەشداریی لە گفتوگۆکانی دۆحە کردووە، لە بارەی ئاڵوگۆڕکردنی ئازادکردنی بارمتەکان کە پیاو و سەربازەکانیش بگرێتەوە.

ئاماژە بەوەکراوە، واپێشبینی دەکرێت لەلای حەماس ژن و منداڵی ئیسرائیلی مابێت، هەر بۆیە باشترە بۆ دوو رۆژی تریش ئاگربەست درێژبکرێتەوە.

سەرچاوەکەی سی ئێن ئێن ئاشکرایکردووە، کە بەرپرسانی تەلئەبیب و واشنتن و دۆحە و قاهیرە رێککەوتوون بۆ درێژکردنەوەی ئاگربەست بۆ ماوەی 48 کاتژمێر تاکو بارمتەی زیاتر ئازاد بکرێت.

ئەمە لە کاتێکدایە، مەجید ئەنساری، وتەبێژی وەزارەتی دەرەوەی قەتەر رایگەیاندبوو، لە ماوەی سەرەتای ئاگربەستدا کە چوار رۆژی خایاندبوو، 150 بارمتەی فەلەستینی ئازادکراون و لە بەرامبەریشدا 69 بارمتەی ئیسرائیل لەلای حەماس بوون ئازادکراون.