ئاگربەست کۆتاییهات و شەڕ دەستیپێکردەوە

SNN-

ئاگربەستە هەفتەیییەکەى نێوان ئیسرائیل و حەماس کۆتاییهات تاوەکو ئێستاش هیچ شتێک لە ئارادا نییە بۆ درێژکردنەوەی گرێبەستەکە، ئیسرائیلیش سورە لەسەر بەردەوامیی هێرشەکانى و وەزارەتی تەندروستیی غەززەش رایگەیاند، دوای کۆتاییهاتنی ڕاگرتنی مرۆیی پێکدادانەکان، 32 فەڵەستینی لە هێرشەکانی ئیسرائیلدا لە غەززە کوژراون ودەیانی دیکەش کە زۆربەیان ژن و منداڵن برینداربوون”.

بەپێى ئەو وادەیەى دوێنێ پێنجشەممە 30ی تشرینی دووەمی 2023 دیاریکرا، ئەمڕۆ ئاگربەستى نێوان حەماس و ئیسرائیل کۆتاییهاف هیچ دەنگۆیەک بۆ درێژکردنەوەى وادەکە نییە و سوپاى ئیسرائیلیش دەڵێت: بەرەبەیانى ئەمڕۆ و پێش ئەوەى ئاگربەستەکە کۆتایی بێت حەمماس موشەکى ئاڕاستەى ئیسرائیل کردوە و لە بەرامبەردا کەرتى غەززە لەژێر هێرشدایە و ئیسرائیل لەگەڵ وەستانى ئاگربەست هێرشەکانى دەستپێکردەوە.

ئەمڕۆ 56  رۆژە شەڕی نێوان ئیسرائیل و حەماس بەردەوامە و  لە کۆتا کاتژمرەکانی راگەیاندنی ئاگربەستیشدا ئیسرائیل 30 دیلى فەڵەستینى ئازاد کردوە و لە بەرامبەریشدا حەماس هەشت خێزانى ئازاد کردوە.

لە رۆژى 24ی مانگی رابردوو بە نێوەندگیریی چەند وڵاتێک حەماس و ئیسرائیل رێککەوتن بە راگەیاندنى ئاگربەست بۆ ماوەى چوار رۆژ بە چەند مەرجێک و چەندین دیل و زیندانى لە هەردولا ئازادکران، دواتر ئاگربەستەکە بۆماوەى دوو رۆژ درێژکرایەوە و دوایی کۆتاییهاتنى ئەو وادەیەش جارێکى دیکە وادەکە بۆماوەی رۆژێک درێژکرایەوە و لەو ماوەیەشدا بەردەوام ئازادکردنى دیل و زیندانییەکان لە هەردولا بەردەوام بوو، ئەمڕۆش کۆتایی بە ئاگربەست هات و شەڕیش دەستیپێکردەوە.