وەزارەتی کارەبا: بەمزووانە کێشەی کوژانەوەی کارەبا چارەسەر دەبێت

SNN-

وەزارەتی کارەبای حکومەتی هەرێمی کوردستان رایگەیاند: بەهۆی گرفتێکی تەکنیکییەوە، کوژانەوەی گشتی لە سیستەمی کارەبای هەرێم روویدا و تیمەكانی وەزارەتی كارەبا سەرقاڵی چارەسەرکردنی کێشەکە و گەڕانەوەی كارەبای گشتین و بەمزووانە کێشەی کوژانەوەی گشتی چارەسەر دەکرێت.

وەزارەتەکە روونکردنەوەیەکی بڵاوکردووەتەوە و دەڵێت:” ئێوارەی رۆژی پێنجشەممە بەهۆی گرفتێكی تەكنیكییەوە، تەواوی یەكەكانی بەرهەمهێنانی كارەبای هەرێم كوژانەوە و تیمەکانی وەزارەتی كارەبا دەمودەست کێشەکەیان چارەسەر كرد، بەڵام كاتژمێر (1:00)ی شەو بۆ جاری دووەم كوژانەوەی گشتی ڕوویدا و، ئێستا تیمەكانی کارەبای هەرێم سەرقاڵی ئاساییكردنەوەی دۆخی سیستەمی كارەبای هەرێمی كوردستانن و بەم نزیكانە چارەسەر دەکرێت”.

ئەوە لە کاتێکدایە پێشتر کارەبای سلێمانی لە روونکردنەوەیەکدا بڵاویکردەوە کە لە کاتژمێر 4:00 ی بەیانی ئەمڕۆوە و هەینی کارەبای گشتی کوژاوەتەوە بێ ئەوەی هۆکارەکەی بزانن.