وەزارەتی کارەبا: هاککردنی تۆڕەکانی کارەبا ئەسڵ و ئەساسی نییە

SNN-

بریکاری وەزارەتی کارەبای هەرێمی کوردستان رەتیدەکاتەوە کە کوژانەوەی گشتی کارەبای هەرێم بەهۆی هاککردنی تۆڕەکانەوە بووبێت و دەشڵێت:” لیژنەمان بۆ پێکهێناوە دواتر هۆکارەکەی بۆ خەڵک رووندەکەینەوە”.

کامیل قەزاز، بریکاری وەزارەتی کارەبای حکومەتی هەرێمی کوردستان لە لێدوانێکدا بە SNN-ی راگەیاند، ئەو دەنگۆیانەی باس لە هاککردنی تۆڕەکانی کارەبا دەکەن دوورە لە راستییەوە و تۆڕی کارەبا کوا هاکدەکرێت، ئەوە تەنها قسەی فەیسبووک چی و سۆشیال میدیاکانە و هیچ ئەسڵ و ئەساسی نییە، بەڵکو هۆکارەکەی کێشەکی تەکنیکییە.

بریکاری وەزارەتی کارەبای حکومەتی هەرێمی کوردستان وتیشی: لیژنەی لێکۆڵینەوەمان پێکهێناوە و دوای تەواوبوونی کاری لیژنەکە ئەنجامی لێکۆڵینەوەکە رادەگەیەنین و هۆکارەکەی بڵاودەکەینەوە.

ئەوە لە کاتێکدایە کە دوێنێ هەینی وەزارەتی کارەبای حکومەتی هەرێمی کوردستان بڵاویکردەوە کە کوژانەوە لە کارەبای گشتی روویداوە و  دوای زیاتر لە 10 کاتژمێر رایگەیاند کێشەکە چارەسەرکراوە