لە ئێران 12 پۆلیس لە هێرشێکدا کوژران

SNN

لە هێرشێکی چەکداریدا بۆ سەر بارەگایەکی هێزەکانی پۆلیس لە پارێزگای سیستان و بەلووچستاندا لە باشووری رۆژهەڵاتی ئێران، 12 پۆلیس کوژران.

ئەمڕۆ هەینی 15ی كانوونی یه‌كه‌م، عەلیرەزا مەرحەمەتی، جێگری پارێزگاری سیستان و بەلووچستان بۆ کاروباری ئەمنی بە میدیای فەرمیی ئێرانی راگەیاند، بەرەبەیانی ئەمڕۆ هێرش کراوەتە سەر بارەگای هێزەکانی پۆلیسی راسک و بە هۆیەوە 12 کەس لە هێزەکانی پۆلیس کوژراون و دوو کەسی تریش برینداربوون.

ناوەندی راگەیاندنی پۆلیسی سیستان و بەلووچستانیش لە راگەیه‌ندراوێکدا هێرشەکەی پشتڕاستکردەوە و ئاشکرایکرد، “نیوەشەوی رابردوو لەلایەن تیرۆریستەکانەوە بەشێوەیەکی ناجوامێرانە هێرشکراوەتەوە سەر بارەگای هێزەکانی پۆلیس لە قەزای راسک”.

میدیا ئێرانییەکان لەوبارەیەوە جەختیان لەوەکردووەتەوە، گرووپی جەیشولعەدل، کە گرووپێکی چەکداری بەلووچەکانە، بەرپرسیاریێتی هێرشەکەیان لە ئەستۆ گرتووە.