مانگى رابردوو رۆژانه 220 خێزان له عێراق هه‌ڵوه‌شاونه‌ته‌وه
واژووكردنى گرێبه‌ستى جیابوونه‌وه | فۆتۆ: Getty Images/iStockphoto
SNN
به‌پێى ئامارێكى ئه‌نجوومه‌نى باڵاى دادوه‌ریی عێراق مانگى رابردوو شه‌ش هه‌زار و 620 خێزان له عێراق هه‌ڵوه‌شاونه‌ته‌وه كه ده‌كاته رۆژانه 220 خێزان.
له راگه‌یه‌نراوێكدا، ئه‌نجوومه‌نى باڵاى دادوه‌ریی عێراق ئامارى هاوسه‌رگیریی و جیابوونه‌وه‌ى له مانگى تشرینى دووه‌مدا خستووه‌ته‌ڕوو و ئاشكراى كردووه، “مانگى رابردوو 28 هەزار و 807 كه‌س له سه‌رتاسه‌رى عێراق هاوسه‌رگرییان كردووه و خێزانیان دروستكردووه”.
له‌باره‌ى ئاماره‌كانى جیابوونه‌وه‌وه ئه‌نجوومه‌نى باڵاى دادوه‌ریی عێراق ئه‌وه‌شى خستووه‌ته‌ڕوو، “شه‌ش هه‌زار و 620 خێزان هه‌ڵوه‌شاونه‌ته‌وه به‌هۆى لێكجیابوونه‌وه‌ى هاوسه‌ره‌كان، كه ئه‌مه‌ش هاوشانه له‌گه‌ڵ هه‌ڵوه‌شانه‌وه‌ى 220 خێزان له رۆژێكدا”.
به‌پێى راگه‌یه‌نراوه‌كه، “زۆرترین رێژه‌ى هاوسه‌رگیریی كردن له ناوچه‌ى ره‌سافه‌ى به‌غدا بووه كه 5 هه‌زار و 151 گرێبه‌ستى هاوسه‌رگریی بووه، كه‌مترینیش له پارێزگاى موسه‌نا بووه كه 684 گرێبه‌سته”.
ئه‌نجوومه‌نى باڵاى دادوه‌ریی عێراق له راگه‌یه‌نراوه‌كه‌یدا ئه‌وه‌شى خستوه‌ته‌ڕوو كه، “زۆرترین حاڵه‌تى جیابوونه‌وه له ناوچه‌ى كه‌رخى به‌غدا بووه كه هه‌زار و 176 حاڵه‌ته”.
