هۆكارى ته‌قینه‌وه‌كه‌ى ئێران به فه‌رمى ئاشكرا بوو
دیمه‌نى گواستنه‌وه‌ى قوربانیانى ته‌قینه‌وه‌كه‌ى كرمان | ڤیدیۆ: Tasnim
SNN
كه‌مێك له‌مه‌وبه‌ر، جێگرى پارێزگارى كرمان رایگه‌یاند، ئه‌و دوو ته‌قینه‌وه‌یه‌ى روویاندا، به‌هۆى دوو بۆمبى چێنراوه‌وه روویانداوه، وتیشى: “كرده‌وه‌یه‌كى تیرۆریستی بووه”.
پاشنیوه‌ڕۆى ئه‌مڕۆ چوارشه‌ممه 3ى كانونى دووه‌م، له‌سه‌ر رێگاى ئه‌و گۆڕستانه‌ى كه قاسم سلێمانى تێدا به‌خاكسپێردراوه له شارى كرمانى ئێران دوو ته‌قینه‌وه روویاندا.
به‌پێى ئاماره سه‌رتاییه‌كان، كه له میدیاكانى ئێران بڵاوكراونه‌ته‌وه، تاوه‌كو ئێستا 70 كوژراو و زیاتر له 170 كه‌س بریندار بوون، ئه‌گه‌رى زیادبوونى رێژه‌ى قوربانیه‌كانیش هه‌یه”.
له‌و باره‌یه‌وه، كه‌مێك له‌مه‌وبه‌ر سه‌عید شه‌عرباف، جێگرى پارێزگارى كرمان به میدیاى وڵاته‌كه‌ى راگه‌یاند، “دوو ته‌قینه‌وه‌كه بۆمبى چێنراو بوون و له‌ڕێگه‌ى دوو جانتاوه دانراون و به كۆنترۆڵ ته‌قێنراونه‌ته‌وه”.
جێگرى پارێزگارى كرمان، “كرده‌وه‌كه‌ى به تیرۆریستى له قه‌ڵه‌مدا”.
جێگرى پارێزگارى كرمان ئاشكراشیكرد، “ماوه‌ى نێوان دوو ته‌قینه‌وه‌كه ته‌نیا 10 خوله‌ك بووه و دوابه‌دواى یه‌ك ته‌قێنراونه‌ته‌وه”.
هاوكات رێكخراوى فریاكه‌وتنى ئێران له به‌یاننامه‌یه‌كدا ئاشكراى كرد، “به‌هۆى ته‌قینه‌وه‌كه‌وه 73 كه‌س گیانیان له‌ده‌ستداوه و 170 كه‌سیش بریندار بوون”.
