نانەواکەی هەولێر دەستگیرکرا
عەلی حەمەسەعید-SNN
دوای ئەوەی ئەمڕۆ هاووڵاتییەک کە پیشەی نانەوایە و بەشداری خۆپیشاندانێکی خاوەن نانەواخانەکانی هەولێرکرد و لە گرتەیەکی ڤیدیۆیدا نیگەرانی حۆی لەبارەی هەڵسوکەوتی ئێدارەی هەولێر دربڕی، ئێوارەی ئەمڕۆ لەلایەن ئاسایشی پارتییەوە دەستگیرکرا.
بەگوێرەی ئەو زانیارییانەی کە لەسەرچاوەیەکی ئاسایشی هەولێر بە SNNدراون ئەوەخراوەتەڕوو، دوای بڵاوبوونەوەی گرتە ڤیدیۆییەکەی ( ئیدریس مەسعود) کە پیشەی نانەوایە و ئەمڕۆ بەشداری خۆپیشاندانی خاوەن نانەواخانەکانی هەولێری کردبوو،هێزێکی ئاسایشی پارتی سەرلەئێوارەی ئەمڕۆ ناوبراویان دەستگیرکردووە.
ئاماژەی بەوەشکرد، هێزەکەی ئاسایش بە کەسوکاری ئەو خاوەن پیشەیان ڕاگەیاندووە کە دەیبنە ئاسایش هەندێک قسەی بۆدەکەن وئامۆژگاری دەکەن پاشان ئازادی دەکەن.
دەستگیرکردنی ئەو خاوەن پیشەیە لەدوای ئەوەدێت کە لەگرتەیەکی ڤیدیۆیدا وێڕای نیگەرانی لە هەڵسوکەوت و مامەڵەی ئیدارەی هەولێر لەگەڵ هاووڵاتیان و کاسبکاران، لەهەمان کاتیشدا دوا لەهاووڵاتیان دەکات “چیتر بێدەنگ نەبن و ئەوستەمەی لێیان دەکرێت قەبوڵی نەکەن”.
