مەڵبەندی هەولێری یەکێتی: باج خستنەسەر قسە و ناڕەزایی خەڵك پێشهاتێکی زۆر مەترسیدارە
لۆگۆى یەکێتیی نیشتمانیی کوردستان | فۆتۆ: SNN
عەلی حەمە سەعید- SNN
مەڵبەندی هەولێری یەکێتی بە فەڕمی لەسەر دەستگیرکردنی ئەو نانەوایەی هەولێر هاتەدەنگ کە ئەمڕۆ ڕەخنەی توندی لە بڕیارێکی سەرۆکی حکومەت گرت و پاشان لە لایەن هێزە ئەمنییەکانەوە دەستگیرکرا.
لە بەشێکی راگەیەندراوەکەدا هاتووە: ” باج خستنەسەر قسەو ناڕەزایی خەڵك پێشهاتێکی زۆر مەترسیدارە” ئەوەشخراوەتەڕوو، ” هەزاران کەس لەپێناوی ڕزگاری و ئازادی هەرێمی کوردستان گیانی خۆیان بەخت کردووە، بەڵام کارەساتێکی زۆر گەورەیە، کە ئێستا هاووڵاتیان نەتوانن، تەنانەت دڵی پڕ لەزوخاوی خۆشیان بەتاڵ بکەنەوە لەبەرامبەر ئەم هەموو باج و زەریبەیەی حکومەت بەسەر کۆمەڵانی خەڵك سەپاندوویەتی” .
ئەمەی خوارەوە دەقی بەیاننامەکەی مەڵبەندی سێی یەکێتییە لە هەولێر:
باج خستنەسەر قسەو ناڕەزایی خەڵك پێشهاتێکی زۆر مەترسیدارە .
دەستگیرکردن لەسەر قسەکردن و ناڕەزایی هاووڵاتیان، کردەوەیەکی زۆر مەترسیدارە و هەموو دەسەڵاتەکان دەخاتە ژێر پرسیاری زۆر قورسەوە .
هەزاران کەس لەپێناوی ڕزگاری و ئازادی هەرێمی کوردستان گیانی خۆیان بەخت کردووە، بەڵام کارەساتێکی زۆر گەورەیە، کە ئێستا هاووڵاتیان نەتوانن، تەنانەت دڵی پڕ لەزوخاوی خۆشیان بەتاڵ بکەنەوە لەبەرامبەر ئەم هەموو باج و زەریبەیەی حکومەت بەسەر کۆمەڵانی خەڵك سەپاندوویەتی .
پێویستە هێزە سیاسەکان لەگەڵ هەموو کۆمەڵە و ڕێکخراو و سەندیکاکانی کرێکارانیش بێنە دەنگ لەدژی ئەم بەرتەسککردنەوەی ئازادی ڕادەربڕین ، ناکرێ هاوڵاتیەك قسەیەك بکاو ئاسایش.یش دەستگیری بکات .
