سۆران عومەر: حکومەتی عێراق نەیتوانیوە نرخی دۆلار بە تەواوی کۆنترۆڵ بکات

SNN

ئەندامێکی لیژنەی ئابووری پەرلەمانی عێراق رایگەیاندووە، بەرپرسیارێتی دانەبەزینی نرخی دۆلار لە ئەستۆی هەندێك بەرپرسەوەیە، دەڵێت، “گەندەڵکاران سوود لەو دۆخە وەردەگرن.”

ئەمڕۆ سێشەممە 9ی کانوونی دووەم، سۆران عومەر، ئەندامی لیژنەی ئابووری لە ئەنجوومەنی نوێنەرانی عێراق بە ڕۆژنامەی سەباحی راگەیاندووە، بەهۆی بەردەوامبوونی بەقاچاخبردنی دۆلار و سپیکردنەوەی پارە لە رێی بانک و نووسینگەکانی ئاڵوگۆڕی دراوەوە، حکومەتی عیراق نەیتوانیوە نرخی دۆلار بە تەواوی کۆنترۆڵ بکات.

وتوویەتی: “سەرباری بەردەوامبوونی ڕێکارەکانی بانکی ناوەندی، بەڵام هێشتا جیاوازی نێوان نرخی فەرمی و نرخی دۆلار لە بازاڕەکاندا زۆرە و هەندێک جار دەگاتە 25 هەزار دینار”.

ئاماژەی بەوەکردووە، “گەندەڵکارەکان سوود لە بەرزیی نرخی دۆلار وەردەگرن و یاریکردن بە نرخی دۆلاریش لە بازاڕی ڕەشدا هەندێك بەرپرسی لەپشتە”.

ئەو پەرلەمانتارە داوا دەکات، چارەسەری ڕیشەیی بۆ دیاریکردنی نرخی دۆلار بدۆزرێتەوە، دەڵێت “بەردەوامبوونی دۆخەکە بەو شێوەیە کاریگەریی نەرێنی لەسەر ئابووری عێراق دروست دەکات و ئەوەش مەترسییەکی گەورەیە و دەرەنجامی نەخوازراویشی لێدەکەوێتەوە.